مىسىردا سودىرلاردىڭ مەشىتكە شابۋىلىنان 155 ادام قۇربان بولدى
استانا. قازاقپارات - مىسىردىڭ سيناي جارتىلاي ارالىنىڭ سولتۇستىگىندە سودىرلاردىڭ مەشىتكە شابۋىلداۋىنان 155 ادام قۇربان بولىپ، 120 ادام زارداپ شەكتى.
بۇل تۋرالى ت ا س س اگەنتتىگى رەسمي دەرەككوزدەرگە سىلتەمە جاساپ حابارلادى.
وسىعان دەيىن مەملەكەتتىك MENA اگەنتتىگى سودىرلاردىڭ مەشىتكە شابۋىلىنان 155 ادامنىڭ قايتىس بولعاندىعىن حابارلادى.
شابۋىل سولتۇستىك سيناي پروۆينتسياسىنىڭ استاناسى ەل-اريشادان باتىسقا قاراي 30 ك م قاشىقتىقتا ەر-راۋدا ەلدى مەكەنىندە، جۇما كۇنى ءمىناجات ەتۋ كەزىندە مىقتى دايىندىقپەن ۇيىمداستىرىلعان.
تەرروريستەر مەشىتتى جول تالعامايتىن 4 كولىكپەن قورشاپ الىپ، جامىلعىش زاتتى ءمىناجات ەتىپ جاتقان ادامداردىڭ ورتاسىنا تاستاپ، جارىپ جىبەرىپ، ارتىنان ولارعا قاراي وق جاۋدىرعان. حابارلامادا شابۋىلداۋشىلاردىڭ جاراقات العان ادامداردى الىپ كەتۋگە كەلگەن جەدەل جاردەم كولىكتەرىنە دە وق اتقاندىعى ايتىلادى.
سولتۇستىك سيناي پروۆينتسياسىنىڭ بارلىق اۋرۋحانالارى مەن مەديتسينالىق مەكەمەلەرىندە توتەنشە جاعداي جاريالاندى.
ەل اسكەرى مەن پوليتسيا قىزمەتكەرلەرى ايماقتى تەكسەرۋ شارالارىن جۇرگىزىپ جاتىر. وسى وقيعاعا بايلانىستى مىسىر پرەزيدەنتى ابدەل فاتتاح اس-سيسي ۇلتتىق قاۋىپسىزدىك كەڭەسىنىڭ شۇعىل ءماجىلىسىن وتكىزدى جانە وعان ەلدىڭ بارلىق كۇش-قۋات قۇرىلىمدارى قاتىستى.
ىشكى ىستەر مينيسترلىگى تەراكت بويىنشا تەكسەرۋ جۇمىستارىن جۇرگىزۋمەن اينالىساتىن ارنايى كوميسسيا قۇردى. سونىمەن قاتار پوليتسيا مەشىتتەر مەن شىركەۋلەردى قوسا العاندا بارلىق ماڭىزدى مەملەكەتتىك نىساندارعا كۇزەتتى كۇشەيتتى.
ەلدە مەملەكەت باسشىسىنىڭ تاپسىرماسىمەن تەرروريستىك اكت قۇرباندارى ءۇشىن ءۇش كۇندىك ازا ءتۇتۋ كۇنىن جاريالادى.
