ەكيپاج تۋ-154 ۇشاعىن تەڭىزگە قوندىرماق بولعان
سۇڭگۋىرلەر وسى كەزگە دەيىن تەڭىزدەن ۇشاقتىڭ قاناتتارى مەن ارت جاق بولىگىنىڭ سىنىقتارىن تاپتى.
بۇعان دەيىن ت ا س س ماسكەۋگە اۋە اپاتى قۇرباندارىنىڭ مۇردەلەرى مەن دەنە بولشەكتەرى سالىنعان العاشقى ۇشاق جەتكەنىن حابارلادى. مايىتتەردىڭ ءبىرىنىڭ كىم ەكەنى انىقتالعانىمەن، اتى- ءجونى اتالماي وتىر. «ينتەرفاكس» اگەنتتىگىنىڭ حابارلاۋىنشا، ۇشاق قۇلاعان اۋماقتا 80 جولاۋشىنىڭ مۇردەلەرى مەن دەنە بولشەكتەرى تابىلعان. رەسەيلىك «فونتانكا» سايتى ەكيپاج كومانديرى رومان ۆولكوۆتىڭ ءمايىتى تابىلعانىن حابارلادى. ءبىراق بۇل اقپارات ازىرگە رەسمي تۇردە راستالعان جوق، قۇتقارۋ جۇمىستارى جالعاسىپ جاتىر.
25 - جەلتوقساندا سوچي ايرودرومىنان ماسكەۋ ۋاقىتىمەن تاڭعى ساعات 5.20-دا ۇشىپ شىققان 8 ەكيپاج مۇشەسى مەن 84 جولاۋشىسى بار ۇشاق اۋەگە كوتەرىلگەن سوڭ كوپ ۇزاماي راداردان جوعالىپ كەتكەن. جولاۋشىلار اراسىندا رەسەيلىك اسكەري قىزمەتكەرلەر، سيرياداعى «حمەيميم» اۋە بازاسىنداعى رەسەي اۋە- عارىش كۇشتەرى توبىن جاڭا جىل مەرەكەسىمەن قۇتتىقتاۋعا بارا جاتقان الەكساندروۆ اتىنداعى ءان- بي اسكەري ءانسامبلى مۇشەلەرى جانە رەسەيلىك توعىز جۋرناليست بولعان.
مەرت بولعانداردىڭ اراسىندا «ادىلەتتى كومەك» قورىنىڭ جەتەكشىسى، تانىمال دارىگەر ەليزاۆەتا گلينكا دا بار.
رەسەيدىڭ فەدەرالدىق قاۋىپسىزدىك قىزمەتى تۋ-154 ۇشاعىندا تەراكت بولۋى مۇمكىن دەگەن بولجامدى تەرىستەپ وتىر. ۆەدومستۆو اپاتقا ساپاسىز جانارماي سالدارىنان ۇشاق قوزعالتقىشىنىڭ ىستەن شىعۋى، تەحنيكالىق اقاۋ نەمەسە ۇشقىشتىڭ قاتەلىگى سەبەپ بولۋى مۇمكىن دەيدى. ازىرگە ۇشاق بورتىنداعى سوزدەردى جازىپ الاتىن قۇرىلعى تابىلعان جوق.
«ازاتتىق» جاڭالىقتارى
