بىشكەك قالاسىنداعى ا ق ش ەلشىلىگىنە 152 توننا قۇپيا جۇك جىبەرىلگەن

استانا. قازاقپارات - قىرعىزستاندا جۇمباق «ديپلوماتيالىق پوشتاعا» قاتىستى داۋ-داماي تۋىنداپ وتىر. ا ن-124 ۇلگىسىندەگى ەكى ۇشاق بەلگىسىز جۇك كونتەينەرلەرىن ا ق ش ەلشىلىگىنە جەتكىزدى.

قىرعىزدىڭ ءتارتىپ ساقشىلارى اتالعان جۇكتى تەكسەرە المايدى. سەبەبى ديپلوماتيالىق پوشتانى اشىپ قاراۋعا رۇقسات جوق. تۋرا وسىنداي جۇكتەردى امەريكا ۋكراينادا بولعان مايدان توڭكەرىسىنە دەيىن كيەۆكە كۇندە تاسىپ جۇرگەن كورىنەدى.

اراب امىرلىكتەرىنەن ا ق ش- تىڭ بىشكەك قالاسىنداعى ەلشىلىگىنە جىبەرىلگەن قۇپيا جۇكتى ەشكىم بايقامايتىن دا ەدى. الايدا جەرگىلىكتى جۋرناليستەر ول جۇكتىڭ سالماعىن كورىپ، قاتتى ويلانىپ قالعان ەكەن. 12 كونتەينەردىڭ جالپى سالماعى - 152 توننا. ۋكراينانىڭ «انتونوۆ اۋە جولدارى» كومپانياسى تاسىمالداعان جۇكتى ماناس اۋەجايىندا التى جۇك ماشيناسى كۇتىپ العان-دى. «كوممەنتاري بەرە المايمىز»، - دەپتى ا ق ش ەلشىلىگى. الايدا جۋرناليستەر تۋرا وسىنداي كونتەينەرلەردى مايدان توڭكەرىسىنە دەيىن كيەۆكە كۇن سايىن جەتكىزىلگەنىن ەسكە الىپ، سونى ايتا باستاعان كەزدە ەلشىلىكتىڭ وكىلدەرى: «بۇل ەلشىلىكتىڭ جاڭا عيماراتىنا ارنالعان ماتەريالدار»، - دەپ قىسقا عانا اقتالادى.

ساياسات تانۋشى يگور شەستاكوۆتىڭ ايتۋىنشا، بىلتىر امەريكا ءوزىنىڭ اسكەري بازاسىن جاپسا دا، كورشى ەلدەردى باقىلايتىن تەحنيكالىق پەرسونالدىڭ جۇمىسىن جاپقان جوق. «ولاردى ەلشىلىككە اۋىستىرۋى بەك مۇمكىن. مىنە، سولاردىڭ جۇمىسىنا قاجەتتى تەحنيكا اراب امىرلىكتەرىنەن جەتكىزىلگەن بولار»، - دەيدى ساراپشى.

وعان قوسا، ا ق ش- تىڭ مەملەكەتتىك دەپارتامەنتىنىڭ بىشكەككە اتى شۋلى ريچارد مايلستى ۋاقىتشا سەنىمدى وكىل رەتىندە تاعايىنداپ وتىرعانى تەگىننەن تەگىن ەمەس. بۇقارالىق اقپارات قۇرالدارى ونى «گۇلدى رەۆوليۋتسيالاردىڭ كونسترۋكتورى» رەتىندە جاقسى بىلەدى.

«ا ق ش بۇنىڭ ءبارىن ەسەپتەپ قويعان. قاراڭىزشى، ۋكراينادا نە بولدى؟ ەۋرومايدان. ەندى، ولار قىرعىزستانعا كىرىپ، اسكەري حاوس جاساماقشى. امەريكا فەرعانا القابىندا شيەلەنىس ۇيىمداستىرىپ، وعان رەسەيدى تارتىپ، بەلشەسىنەن باتىرۋدى كوزدەيدى. مىنە، سول ءۇشىن مايلستى پەنسيادان دا الىپ شىقتى»، - دەيدى ساياسي ساراپشى ەندريۋ كوريبكو.

ءيا، بايقاپ قاراساق، ريچارد مايلس تاجىريبەلى ريەۆوليۋتسيالىق تەحنولوگ رەتىندە كەڭىنەن تانىمال. ماسەلەن، گرۋزياداعى «راۋشان گۇلدەرى» توڭكەرىسىنە دەيىن ءبىر جىل بۇرىن ونى سول جاققا جۇمىسقا جىبەرگەن. وعان دەيىن ول يۋگوسلاۆيادا تاجىريبە جيناپ، ميلوشيەۆيچتى تاقتان تايدىرۋ شاراسىنىڭ كۋاگەرى بولدى. 92-جىلدارى ءازىربايجانداعى توڭكەرىستەر كەزىندە دە مايلس مىرزا كوزگە ءتۇسىپ ۇلگەردى. ەندى، ونى ورتالىق ازياعا جىبەرىپ وتىر.

ايتا كەتەيىك، بيىل قىرعىزستاندا پارلامەنت سايلاۋى ۇيىمداستىرىلادى. قازاقستاندا دا پارلامەنتتىك سايلاۋدىڭ اۋىلى الىس ەمەس. امەريكانىڭ پوليتتەحنولوگتارى رەسەيدىڭ قازىرگى قارقىنىڭ تەجەيمىز دەپ، ءبىزدىڭ ەلىمىزدىڭ ىشكى ومىرىنە ارالاسپاسا بولعانى.

اۆتور: ازىرلەگەن ارمان اسقار

«الاش ايناسى»