ۆەلوساياحاتشى احمەت بايتۇرسىن ۇلىنىڭ 150 جىلدىعىنا وراي ىستانبۇلعا دەيىن شەرۋ جاساماقشى
باستاما اۆتورى قازىر «كوكقاسقاسىن» (ساياحاتقا ارنالعان ۆەلوسيپەدتەرىنىڭ بىرىنە وسىنداي ات قويىپتى) جابدىقتاپ، ءوزىنىڭ دە بابىن شىڭداپ ءجۇر.
«احمەت بايتۇرسىن ۇلىنىڭ تۋعانىنا 150 جىل تولۋىنا ارنالعان حالىقارالىق ۆەلوشەرۋدى مەملەكەت ۇستازىنىڭ كىندىك قانى تامعان جەر - اقكول، سارىتۇبەكتەن تۋعان كۇنىنە قاراي 4-قىركۇيەكتە باستايمىن. ءدال تۋعان كۇنى – 5-قىركۇيەكتە احمەت اتامىزدىڭ مەرەيجاسىنا ارنالعان نەگىزگى ءىس- شارالار وتەتىن اۋدان ورتالىعى تورعايدا جالعاستىرىپ، امانتوعاي، اۋليەكول، قوستاناي، اقتوبە، بەستاماق، اتىراۋ، اقتاۋ ارقىلى ءجۇرىپ، قۇرىق تەڭىز ايلاعىنا بارىپ توقتايمىن. ول جەردەن كەمەگە وتىرىپ، كاسپي تەڭىزىنەن ءوتىپ، باكۋدە تەمىراتىما قايتادان ەر سالامىن. ءارى قاراي گانجا قالاسىنا سوعىپ، گرۋزيا استاناسى تبيليسيدەن كۋتايسي ارقىلى قارا تەڭىز جاعاسىنداعى باتۋمي جانە تۇركيانىڭ ريزە، ترابزون، وردۋ، سامسۋننان ءوتىپ، انكاراعا جەتسەم دەيمىن. اتاتۇرىككە ءتاۋ ەتىپ، ۆەلوشەرۋدى ىستانبۇلداعى مۇستافا وزتۇرىك اعامىزدىڭ زيراتىندا تۇيىندەسەم دەگەن نيەتىم بار»، - دەيدى ۆەلوساياحاتشى.
ءوزىنىڭ جوبالاۋىنشا، قازاقستاننان بولەك 3 مەملەكەتتىڭ اۋماعىندا وتەتىن ساپارعا 55 كۇن كەتۋى مۇمكىن.
«ۆەلوشەرۋگە جالعىز قاتىسامىن. سولو تاسىلىندە وتەدى. 2 ايعا سوزىلاتىندىقتان، اركىمنىڭ ۋاقىت، قارجى، جۇمىس، وتباسى جاعىنان مۇمكىندىگى بولا بەرمەيدى. 55 كۇندە 5555 شاقىرىمدى ەڭسەرسەم دەپ ويلايمىن. احمەت اتامىزدى ۇلىقتاۋدان باسقا ەلىمىز بەن ازەربايجان، گرۋزيا، تۇركيامەن ارادا ديپلوماتيالىق قارىم- قاتىناستىڭ ورناعانىنا 30 جىل تولۋ مەرەيتويىن ناسيحاتتاۋعا دا ۇلەس قوسسام دەگەن نيەتىم بار. بۇدان باسقا، باكۋ، تبيليسي، انكارا، ستامبۇلداعى اباي قۇنانباي ۇلىنىڭ اتىنداعى كوشەلەردى كوزبەن كورىپ، ەسكەرتكىشتەرىنە تاعزىم ەتۋ دە - باستى ماقساتىم. وسى قالالاردا قازاقستان ەلشىلىگى ارقىلى كەزدەسۋ- سۇحبات جاساپ، اعىلشىن تىلىندە حاكىم ابايدىڭ «تولىق ادام» يدەياسىن ناسيحاتتاسام دەيمىن»، - دەدى ەرنات مەلس ۇلى.
وسىنشا كۇردەلى ساپارعا كىم دەمەۋشىلىك جاسايتىنىن سۇراعان ەدىك.
«ازىرگە دەمەۋشىلىك سۇراپ ەشكىمگە شىققان جوقپىن»، - دەپ قىسقا قايىردى. بۇعان دەيىن شەتەل ارحيۆتەرىنەن احمەت بايتۇرسىن ۇلى مەن «الاش» قايراتكەرلەرى تۋرالى دەرەكتەر ىزدەستىرىلىپ جاتقانىن جازعان ەدىك.
