دەپۋتات «قازاقستان بارىسىن» وتكىزۋگە 150 ميلليون تەڭگە بولىنەتىنىن سىنعا الدى

نۇر- سۇلتان. قازاقپارات - نۇر- سۇلتان قالالىق ءماسليحاتىنىڭ دەپۋتاتى نۇرداۋلەت ورازحانوۆ ەلىمىزدە ءداستۇرلى تۇردە وتەتىن «قازاقستان بارىسى» سايىسىنا بولىنەتىن قارجىنىڭ كوپتىگىن ايتىپ، قىسقارتۋدى ۇسىندى، دەپ حابارلايدى قازاقپارات ءتىلشىسى.

«قۇجاتتا كورسەتىلگەن حالىقارالىق تۋرنيرلەردى وتكىزۋگە ورتا ەسەپپەن 59 ميلليون تەڭگە قارجى بولىنەدى ەكەن.

«قازاقستان بارىسى» سايىسىن وتكىزۋگە الدەقايدا كوپ بولىنەدى. 150 ميلليون تەڭگە دەپ كورسەتىلىپتى. ارينە، ۇلتتىق سپورتتى دامىتۋعا ەشقانداي قارسىلىعىم جوق. دەگەنمەن بيۋدجەت قارجىسىن ۇنەمدەۋ كەرەك سياقتى. ەگەر حالىقارالىق سپورت شاراسىن 50 ميلليون تەڭگەگە وتكىزسەك، ونىڭ قاسىندا رەسپۋبليكالىق شارا نەگە قىمبات؟»، - دەگەن ساۋال جولدادى دەپۋتات نۇرداۋلەت ورازحانوۆ قالالىق ءماسليحاتتىڭ وتىرىسىندا.

ساۋالعا جاۋاپ بەرگەن نۇر-سۇلتان قالاسى دەنە شىنىقتىرۋ جانە سپورت باسقارما باسشىسىنىڭ ورىنباسارى الماس ابايەۆتىڭ سوزىنشە سپورتتىق جارىستار وتكىزۋگە قاراجات ونىڭ دەڭگەيى مەن اۋقىمىنا بايلانىستى بولىنەدى.

«مىسالى، «الەم بارىسى» جارىسىن الساق، اتالعان شارا باسقا ەلدەر ءۇشىن اسا تانىمال ەمەس. ياعني بۇل شارانى ناسيحاتتاۋعا، سپورتشىلاردى دايارلاۋ مەن شاقىرۋ اۋقىمدى قارجىنى تالاپ ەتەدى»، - دەپ جاۋاپ بەردى.

دەپۋتات ءوز كەزەگىندە سپيكەردىڭ ءسوزىن ءبولىپ، ماسەلە «الەم بارىسى» ەمەس، «قازاقستان بارىسىنا» قاتىستى ەكەنىن ناقتىلاپ كەتتى.

«تۇسىنىكتى. بۇل ماسەلەنى قايتا قاراستىرامىز»، - دەپ قىسقا قايىردى باسقارما باسشىسىنىڭ ورىنباسارى.

اۆتور: ءالي يبرايەۆ