استانادا احمەت بايتۇرسىن ۇلىنىڭ 150 جىلدىعىنا ارنالعان حالىقارالىق كونفەرەنسيا باستالدى

نۇر-سۇلتان. قازاقپارات - استانادا احمەت بايتۇرسىن ۇلىنىڭ 150 جىلدىعىنا ارنالعان حالىقارالىق عىلىمي-پراكتيكالىق كونفەرەنسيا باستالدى، دەپ حابارلايدى قازاقپارات ءتىلشىسى.

شارا ق ر مەملەكەتتىك حاتشىسى ەرلان قاريننىڭ بايانداماسىمەن باستالدى.

«حالقىمىز ءوزىنىڭ تاريحىندا ەرەكشە ورىنى بار ەكى تۇلعانى «ۇلت ۇستازى» دەپ ارداقتاعان. الدىمەن، ارينە، ۇلى ابايدى ايتامىز. ودان كەيىن احمەت بايتۇرسىن ۇلىنىڭ ەسىمى اتالادى. الاش كوسەمى، قازاقتىڭ ءبىرتۋار پەرزەنتى احمەت بايتۇرسىن ۇلىنىڭ تۋعانىنا بيىل 150 جىل تولىپ وتىر. بۇل مەرەيتويدى يۋنەسكو دەڭگەيىندە اتاپ وتەمىز. تاۋەلسىزدىك ۇلتىمىزدىڭ جادىن جاڭعىرتىپ، تاريحي تامىرىمىزدان قايتادان ءنار الۋىمىزعا جول اشتى. بۇل رەتتە ۇلت ۇستازىنىڭ ەڭبەگىن زەردەلەپ، ونى مول مۇراسىن ۇرپاق ساناسىنا ءسىڭىرۋ بارشامىزعا ورتاق مىندەت. ارينە، الەۋمەتتىك جەلىدە بۇگىن الەمدە بولىپ جاتقان، ءبارىمىز بايقاپ جاتقان دۇربەلەڭ وقيعالار كەزىندە وسىنداي شارا وتكىزۋدىڭ قانداي ماڭىزى بار دەپ جاتقاندار بار. ءبىراق قانداي وقيعالار ورىن السا دا، ءبىز ءوزىمىزدىڭ ۇلتتىق كۇن تارتىبىمىزدەن اۋىتقىماۋىمىز كەرەك»، - دەدى مەملەكەتتىك حاتشى.

ونىڭ پايىمىنشا، احمەت بايتۇرسىن ۇلىنىڭ 150 جىلدىعى ۇلتتىق كۇن تارتىبىندە تۇرعان ۇلت رۋحانياتى ءۇشىن ۇلكەن ءبىر ماڭىزدى تاقىرىپتاردىڭ ءبىرى.

«وسىدان تۋرا ءبىر عاسىر بۇرىن جۇرتىمىز ۇلت زيالىلارىنىڭ باستاماسىمەن احاڭنىڭ 50 جىلدىعىن اتاپ وتكەنىن بارشاڭىز جاقسى بىلەسىزدەر. سودان بەرى تۋرا ءبىر عاسىر ءوتىپ وتىر. ءبىر عاسىردان كەيىن دە احاڭ تاعى دا ۇلتتى ۇيىستىرىپ، ۇلت زيالىلارىن ءبىر جەرگە جيناپ وتىر. بۇل دا ۇرپاقتار ساباقتاستىعىنىڭ ءبىر بەلگىسى. بۇگىن مىنە احاڭ اڭساعان تاۋەلسىز ەلدىڭ ۇرپاقتارى ونىڭ 150 جىلدىق مەرەيتويىندا باس قوسىپ وتىر»، - دەدى ەرلان قارين.

ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق- دراما تەاترىندا ءوتىپ جاتقان كونفەرەنسياعا لاۋازىمدى مەملەكەتتىك قىزمەتكەلەر، الىس-جاقىن شەت مەملەكەتتەردىڭ عالىمدارى، الاشتانۋشىلار، احمەتتانۋشىلار، ادەبيەتشى عالىمدار، تاريحشىلار، زيالى قاۋىم وكىلدەرى، دەپۋتاتتار قاتىسىپ وتىر.

شارادا م. قويگەلديەۆ، ش. قۇرمانباي ۇلى، د. قامزابەك ۇلى، ا. فازىلجانوۆا، ج. سماعۇلوۆ، ءو. ءابديمان ۇلى، ا. ءىسماقوۆا، ج. جاقىپوۆ، ش. جالماحانوۆ، ا. سالقىنباي، و. جۇبايەۆا، ق. كۇدەرينوۆا، ب. مومىنوۆا، ۇ. ەركىنباي، ت. ايتوۆا، م. ەرمۇحامەت، ت. شانباي، س. اققۇل ۇلى، ر. يماحانبەت، ق. ساق، ا. ءابسادىق، ە. تىلەشوۆ پەن ا. قىدىرشايەۆ جانە ت. ب. زەرتتەۋشىلەر بايانداما وقيدى. سونداي-اق «احمەت بايتۇرسىن ۇلى جانە قازاق فيلولوگياسىنىڭ ماسەلەلەرى»، «احمەت بايتۇرسىن ۇلى جانە قوعامدىق-گۋمانيتارلىق عىلىمدار» اتتى سەكسيالىق وتىرىستار بولادى. كونفەرەنسيادان كەيىن ساعات 18.00-دە ەركەعالي راحماديەۆ اتىنداعى مەملەكەتتىك اكادەميالىق فيلورمونيادا «ۇلت ۇستازى» اتتى ادەبي-سازدى كەش وتەدى.