مەملەكەتتىك كوميسسيا احمەت بايتۇرسىن ۇلىنىڭ 150 جىلدىق مەرەيتويىنا دايىندىقتى پىسىقتادى
قازاقپارات بۇل تۋرالى اقورداعا سىلتەمە جاساپ حابارلايدى.
وتىرىستا 2022-جىلى تويلاناتىن مەرەيتويدى حالىقارالىق دەڭگەيدە، يۋنەسكو اياسىندا اتاپ ءوتۋ جانە دايىندىق ءىس-شارالارىن ۇيىمداستىرۋ ماسەلەلەرى قارالدى. كوميسسيا ءتوراعاسى قىرىمبەك كوشەربايەۆ الاش ارداقتىسى، رەفورماتور عالىمنىڭ ەلدى اعارتۋ جۇمىستارىنداعى ءرولى، ءتىل مەن ادەبيەت عىلىمدارىنىڭ نەگىزىن سالۋداعى زور ەڭبەگىنە توقتالدى.
احمەت بايتۇرسىن ۇلى ۇلتىمىزدىڭ ۇلى تۇلعالارىنىڭ ءبىرى، حالقىمىزدىڭ بەيبىت تە بەرەكەلى ءومىر ءسۇرۋى ءۇشىن ايانباي ەڭبەك ەتكەن، سول جولدا باسىن بايگەگە تىگىپ، «تار جول، تايعاق كەشۋدەن» وتكەن تۇعىرلى قايراتكەر ەكەنىن ايتتى. سونىمەن قاتار الاش بالاسىنىڭ ساۋاتىن اشىپ، ەلىمىزدى وركەنيەتتى مەملەكەتتەردىڭ قاتارىنا قوسۋدى ماقسات تۇتقانىن، «جۇرت ۇقپاسا، ۇقپاسىن جابىقپايمىن. ەل - بۇگىنشىل، مەنىكى - ەرتەڭ ءۇشىن» دەگەن احمەت بايتۇرسىن ۇلى بولاشاق ۇرپاق ءۇشىن قىزمەت ەتكەنىن اتاپ ءوتتى.
«احمەت بايتۇرسىن ۇلى - ۇلتتىق دامۋدىڭ تالاي جىل توت باسىپ قاراۋسىز قالعان تەگەرشىگىن اينالدىرىپ، ۇزدىكسىز قوزعالىسقا قوسىپ بەرگەن ەرتەگىنىڭ ەرلەرىندەي ەرەن تۇلعا. تۋعان حالقىنىڭ رۋحاني جاڭعىرۋىن تاپ ونداي ءبىلىپ، سول جولدا قالتقىسىز قىزمەت ەتىپ، ماڭگى ەسكىرمەيتىن مول مۇرا قوسقان قايراتكەر قازاق دالاسىندا كەمدە كەم»، - دەدى قىرىمبەك ەلەۋ ۇلى.
قازاقستان رەسپۋبليكاسى ءبىلىم جانە عىلىم مينيسترلىگى احمەت بايتۇرسىن ۇلىنىڭ 150 جىلدىق مەرەيتويىن دايىنداۋ جانە وتكىزۋ جونىندەگى جالپىرەسپۋبليكالىق جوسپار جوباسىن تانىستىردى.
اتالعان جوسپاردا احمەت بايتۇرسىن ۇلىنىڭ قىزمەتىن جان-جاقتى تانىتۋعا باعىتتالعان حالىقارالىق، رەسپۋبليكالىق جانە ايماقتىق ءىس-شارالار قامتىلعان. وتىرىستا ق ر ءبىلىم جانە عىلىم ءمينيسترى اسحات ايماعامبەتوۆ، قوستاناي وبلىسىنىڭ اكىمى ارحيمەد مۇحامبەتوۆ، ق ر سىرتقى ىستەر ءمينيسترىنىڭ ءبىرىنشى ورىنباسارى شاحرات نۇرىشيەۆ، ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ بايانداما جاسادى.
ۇلت ۇستازىنىڭ مەرەيتويىن اتاپ ءوتۋ بارىسىندا ەلىمىزدىڭ وقۋ ورىندارىندا عىلىمي-پراكتيكالىق كونفەرەنسيالار، وقۋلار ت. ب ءىس-شارالار ۇيىمداستىرىلادى. تۇركسوي ۇيىمى مۇشەلەرىنىڭ قاتىسۋىمەن حالىقارالىق تۇركولوگيالىق كونگرەسس وتكىزۋ جوسپارلانعان.
الاش قايراتكەرىنىڭ شىعارماشىلىعى بويىنشا ءبىلىم بەرۋ ورىندارىندا اشىق ساباقتار، تاقىرىپتىق كونكۋرستار وتكىزىلەدى. سونىمەن قاتار ۇلت ۇستازىنىڭ تاڭدامالى ەڭبەكتەرىن ورىس، اعىلشىن جانە تۇرىك تىلدەرىنە اۋدارۋ، عىلىمي ەڭبەكتەرىنىڭ تولىق جيناعىنىڭ 12 تومدىعىن باسپادان شىعارۋ، احمەت بايتۇرسىن ۇلىنىڭ جانە «الاش» قوزعالىسىنىڭ باسقا دا قايراتكەرلەرىنىڭ ەڭبەكتەرىن شەتەلدەردىڭ ارحيۆتەرىنەن ىزدەستىرىپ، عىلىمي اينالىمعا ەنگىزۋ بويىنشا زەرتتەۋ جۇمىستارى جۇرگىزىلەدى.
احمەت بايتۇرسىن ۇلىنىڭ ءومىرى تۋرالى كوركەم فيلم ءتۇسىرۋ، مۋزەي-ۇيىنە عىلىمي-رەستاۆراتسيالىق جۇمىستار جۇرگىزۋ دە جوسپارعا ەندى. ۇلى تۇلعانىڭ 150 جىلدىق مەرەيتويىن يۋنەسكو اياسىندا اتاپ ءوتۋ ماسەلەسى اعىمداعى جىلعى قاراشا ايىندا وتەتىن اتالعان ۇيىمنىڭ باس كونفەرەنسياسىندا قارالۋ جوسپارلانۋدا.
كوميسسيا وتىرىسىنىڭ قورىتىندىسى بويىنشا قىرىمبەك كوشەربايەۆ احمەت بايتۇرسىن ۇلىنىڭ 150 جىلدىق مەرەيتويىن جوعارى ۇيىمداستىرۋشىلىق دەڭگەيدە دايىنداۋ جانە وتكىزۋ بويىنشا مەملەكەتتىك ورگاندارعا ءتيىستى تاپسىرمالار بەردى.