ادام 150 جىل ءومىر سۇرە الا ما؟
نۇر- سۇلتان. قازاقپارات - ادام 150 جىل ءومىر سۇرە الا ما؟ The Wall Street Journal باسىلىمى وسىعان قاتىستى ەكى عالىمنىڭ پىكىرىن كەلتىرەدى، دەپ حابارلايدى قازاقپارات.
«يلليونويس ۋنيۆەرسيتەتىنىڭ قوعامدىق دەنساۋلىق ساقتاۋ مەكتەبىنىڭ ەپيدەميولوگيا جانە بيوستاتيستيكا پروفەسسورى س. دج. ولشانسكي مەن الاباما ۋنيۆرسيتەتىنىڭ بيولوگى ستيۆەن وستاد ەكەۋى 2000 -جىلى جاقىندا ادامداردىڭ ءومىر ءسۇرۋ ۇزاقىتىعى 150 جىل بولاتىنىنا باستەسكەن. 150 جاسقا دەيىن ءومىر سۇرەتىن العاشقى ادام دۇنيەگە كەلىپ، قازىرگى زاماندا ءومىر ءسۇرىپ جاتىر ما؟»، - دەپ جازادى The Wall Street Journal.
اۆتوردىڭ ايتۋىنشا، ەكى عالىم ينۆەستيتسيالىق ەسەپشوتقا ءارقايسىسى 300 دوللاردان سالعان. بۇل سوما 2150 -جىلعا قاراي، ياعني، ءباس ۋاقىتى اياقتالعان كەزدە ميلليارد دوللارعا جەتۋى مۇمكىن دەگەن بولجام بار.
«2150 -جىلى بيومەديتسينا عىلىمى مەن دارىلىك قۇرالدار سالاسىنداعى جەتىستىكتەر ادامدارعا 100 جىل ءومىر سۇرۋگە مۇمكىندىك بەرەدى. ال كەيبىر ادامدار 150 جىلعا دەيىن ءومىر سۇرە الاتىن بولادى»، - دەيدى پروفەسور وستاد. ال پروفەسسور ولشانسكيدىڭ ايتۋىنشا، ادامدار ەڭ كوپ دەگەندە ورتاشا ەسەپپەن 85-89 جىل ءومىر سۇرە الادى. جاقسى جاعدايدا ءجۇز جاسقا جەتۋى مۇمكىن، ال 150 جىل دەگەن مۇمكىن ەمەس مەجە.
«پروفەسسور وستادتىڭ ايتۋىنشا، بۇگىنگى ستۋدەنتتەر ءبىر عاسىر ءومىر سۇرە الادى، سەبەبى ولاردىڭ دەنساۋلىعى ادامزات تاريحىنداعى دەنساۋلىق جاعدايىمەن سالىستىرۋعا دا كەلمەيدى. ول ۋاقىت وتە كەلە قارتتىققا قارسى دارىلەر دە پايدا بولادى دەپ ەسەپتەيدى. بۇل ءومىر ساپاسىن وزگەرتەدى» دەپ جازىلعان ماقالادا. ال ونىڭ قارسىلاسى وسى كۇنگە دەيىن ادام ەڭ كوبى 122 جىل ءومىر سۇرگەنىن ايتادى. ال 100 جىلعا دەيىن ءومىر ءسۇرۋ جاڭا نورماعا اينالۋى مۇمكىن بولعانىمەن، ودان اسۋى ەكىتالاي.
«ادام ءومىرىن ۇزارتۋداعى ەڭ جاقسى جول - ادامنىڭ دەنساۋلىعىنىڭ جاقسى بولاتىن كەزەڭىن بارىنشا سوزۋعا ىقپال ەتۋ. سەبەبى ادام ەڭ كوپ دەگەندە 100 جاسقا دەيىن عانا ءومىر سۇرە الادى»، - دەيدى ولشانسكي.
