ديماش قۇدايبەرگەن اقتوبەنىڭ 150 جىلدىعىنا ارنالعان كونسەرتتىڭ توسىنسىيى بولدى
اقتوبە قالاسىنا 150 جىل تولدى. مادەني-سپورتتىق شارالارمەن قاتار تانىمدىق كەزدەسۋلەر دە ۇيىمداستىرىلدى. كەشكىلىك تۇڭعىش پرەزيدەنت اتىنداعى ساياباقتا «ءان تەربەتكەن - اقتوبەم» رەسپۋبليكالىق اۆتورلىق اندەر بايقاۋىنىڭ گالا-كونسەرتى مەن ماراپاتتاۋ سالتاناتى ءوتتى. قاتىسۋشىلارعا قويىلاتىن باستى تالاپ - اۆتورلىق ءان جانە اقتوبەگە ارنالعان تۋىندى ورىنداۋ. مادەني شاراعا نۇر-سۇلتان، الماتى قالالارىنان، اقتوبە، جامبىل وبلىستارىنان 32 ءوتىنىم كەلىپ تۇسكەن. باس جۇلدەنى «قۇتتى مەكەن اقتوبەم» ءانى الدى. جەڭىمپازعا 1 ميلليون تەڭگە بەرىلدى. انشىلەردىڭ ءبارى دە گالا كونسەرت كەزىندە شىرقادى.
ال 150 جىلدىققا ارنالعان باستى مەرەكەلىك شارادا قانات پەن سۆەتا ايتبايەۆتار، ميراس پەن قۇرالاي بەكجانوۆتار، ۆەنەرا الپىسبايەۆا، جادىرا اپىستانوۆا، اسحات تارعىن، ەسەت ءسادۋاقاسوۆ ءان ايتتى. اقتوبەلىكتەر اسىعا كۇتكەن باستى قوناق ءانشى ديماش قۇدايبەرگەن بولدى.
«اقتوبەلىكتەر، جەرلەستەر، قالا قوناقتارى اقتوبەنىڭ 150 جىلدىعىمەن قۇتتىقتايمىن. وسى كۇنگە كۋاگەر بولىپ، الدارىڭا كەلۋگە ءساتى تۇسكەنى ءۇشىن قۋانىشتىمىن. مەرەكە قۇتتى بولسىن! ونەر مايتالماندارىنا قۇرمەت كورسەتىپ جاتقان وبلىس اكىمدىگىنە العىس ايتامىن. كىشىگىرىم سىر شەرتكىم كەلىپ تۇر. اقتوبەگە بىرەر كۇن بۇرىن كەلدىم. وسى كۇنگە ارنايى جوسپارلانعان بولاتىن. مەن ۇستازدارىما العىس ايتامىن. ءساتى تۇسسە الداعى ۋاقىتتا ۇلكەن كونسەرتىممەن كەلگىم كەلەدى»، - دەدى ديماش. وعان «اقتوبە قالاسىنا 150 جىل» توسبەلگىسى بەرىلدى.