قىتايداعى «ءبىر بەلدەۋ، ءبىر جول» فورۋمىنا 150 ەلدىڭ وكىلدەرى قاتىسادى
ولاردىڭ اراسىندا 37 ەلدىڭ پرەزيدەنتتەرى مەن ۇكىمەت باسشىلارى بار. قىتايدىڭ قازاقستانداعى توتەنشە جانە وكىلەتتى ەلشىسى جاڭ شياۋمەن جۋىردا وتكەن كەزدەسۋدە ەلباسى نۇرسۇلتان نازاربايەۆ تا فورۋمعا قاتىساتىنىن ايتقان ەدى.
قازاقستاننىڭ تۇڭعىش پرەزيدەنتىن قىتاي ديپلوماتى فورۋمنىڭ بەلدى ءارى قۇرمەتتى قوناعى رەتىندە اتاپ وتكەن. جالپى، باسقوسۋدا 12 پانەلدى سەسسيا وتكىزۋ جوسپارلانىپ وتىر. جيىن كەزىندە «سيفرلى جىبەك جولى»، «جاسىل ەنەرگەتيكانى دامىتۋ»، «ايماق ارالىق ارىپتەستىك» سەكىلدى تاقىرىپتار اياسىندا وي ءوربۋى ءتيىس. سونىمەن قاتار بيزنەس- قاۋىمداستىق ءۇشىن ارنايى كونفەرەنسيا ۇيىمداستىرىلادى.
جاڭ دەگۋان، قىتايدىڭ قازاقستانداعى تۇڭعىش ەلشىسى، قىتاي حالىقارالىق زەرتتەۋلەر قورىنىڭ قۇرمەتتى ءتوراعاسى:
- قازاقستاندا كوتەرىلگەن باستامانى ىسكە اسىرۋعا قازىر الەمنىڭ 100 دەن استام ەلى اتسالىسىپ وتىر. بۇل جوباداعى قازاق ەلىنىڭ ماڭىزى زور: ول بەلدەۋدىڭ نەگىزگى بۋىنى ءارى ءىرى كولىكتىك حاب سانالادى. قازاقستاننىڭ قىتايمەن بايلانىسىن دامىتۋعا دەن قويعانى قۋانتادى. قىتايدىڭ قازاقستانداعى العاشقى ەلشىسى رەتىندە ايتارىم، نۇرسۇلتان نازاربايەۆپەن بىرنەشە رەت جۇزدەسىپ سويلەستىم. ول قىتاي ساياساتىن جاقسى تۇسىنەدى. قوس ەلدىڭ ەكونوميكا، ەنەرگەتيكا جانە كولىكتىك كوممۋنيكاتسيالاردى دامىتۋ جونىندەگى ستراگەتيالىق ماقساتتارى ساباقتاساتىنىن ءاۋ باستان اشىپ ايتقان.