قازاقستاندا جەرگىلىكتى ماڭىزداعى جولداردى جوندەۋگە جىلىنا 150 ميلليارد تەڭگەدەن بولىنبەك
دەپ حابارلايدى «قازاقپارات» ح ا ا ءتىلشىسى.
«ەلباسى ءوزىنىڭ جولداۋىندا وسى ماسەلەگە ەرەكشە ماڭىز بەرۋدى تاپسىرعان ەدى. سوڭعى 5-6 جىلدىڭ ىشىندە رەسپۋبليكالىق ماڭىزى بار جولدارعا قاراجات ءبولىندى. اتاپ ايتقاندا، باتىس ەۋروپا - باتىس قىتاي جولدارى، استانادان باتىسقا، اتىراۋ مەن اقتاۋعا، پاۆلودارعا، ارى قاراي سەمەي مەن وسكەمەنگە قاراي جولدار سالىنىپ جاتىر. بىلتىر الماتىدان قاپشاعايعا، ودان ارى قاراي تالدىقورعانعا جول سالىندى. تالدىقورعاننان وسكەمەنگە، ارى قاراي قىتايعا جولدار سالۋ دا ۇمىت قالدىرىلعان جوق. ونىڭ ناتيجەسى - بىلتىر قازاقستان ارقىلى 2,5 ميلليون توننا ترانزيتتىك جۇك ءوتتى. ول 2016 -جىلمەن سالىستىرعاندا 50 پايىزعا كوپ. ول ۇلكەن ماڭىزدى ماسەلەلەر»، - دەدى جەڭىس قاسىمبەك وكق- دا وتكەن باسپا ءسوز ءماسليحاتىندا.
ءمينيستردىڭ ايتۋىنشا، سوڭعى جولداۋىندا مەملەكەت باسشىسى جەرگىلىكتى ماڭىزداعى جولدارعا باسىمدىق بەرۋدى تاپسىرعان.
«ونىڭ ساپاسى ۇلكەن جولدارعا قاراعاندا جوعارى ەمەس. سوندىقتان، ەلباسى الداعى 5-6 جىلدىڭ ىشىندە سول جولداردىڭ ساپاسىن كوتەرىپ، رەسپۋبليكالىق ماڭىزى بار جولدارمەن ءبىر دەڭگەيگە كوتەرۋدى جۇكتەدى. جىل سايىن ءبىز ورتالىق بيۋدجەتپەن جانە اكىمدىكتەردىڭ بيۋدجەتىمەن بىرلەسىپ، 60-80 ميلليارد تەڭگەدەي بولەمىز. ءبىراق، ول قاراجات جولداردى ۇستاۋ ءۇشىن جەتكىلىكسىز. سوندىقتان، ەلباسى بۇل سومانى ەكى ەسە ۇلكەيتۋگە تاپسىرما بەردى. وسى جىلدان باستاپ، اتالمىش باعىتقا 150 ميلليارد تەڭگەدەن بولىنەتىن بولادى»، - دەدى ول.
جەڭىس قاسىمبەك اتاپ وتكەندەي، اتالعان قاراجاتتىڭ 50 پايىزى ورتالىق بيۋدجەتتەن، 50 پايىزى جەرگىلىكتى بيۋدجەتتەن بولىنەدى.
«مىسالى، اكىمدىك 5 ميلليارد تەڭگە بولسە، ءبىز مىندەتتى تۇردە 5 ميلليارد تەڭگە بەرۋىمىز كەرەك. سوندىقتان، قازىرگى تاڭدا مىنا قاراجاتتى يگەرۋ ءۇشىن «نۇر وتان» پارتياسىمەن بىرلەسىپ، وسى ماسەلەنى باقىلاۋ شاراسىن ەنگىزەمىز. بۇل ۇلكەن قاراجات. ول تەك جولدار ماسەلەسى ەمەس، كوپتەگەن جۇمىس ورىندارى دا اشىلادى دەپ وتىرمىز»، - دەپ ءتۇيدى مينيستر.
اۆتور: ايان بەكەن ۇلى
