ەكسپو كۋبوگى ءۇشىن بولعان بايگەگە 150 سايگۇلىك قاتىستى

استانا. قازاقپارات - بۇگىن استانا قالاسىنىڭ «قازانات» يپپودرومىندا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ جۇلدەسىنە بايگە تۇرلەرىنەن «ەكسپو كۋبوگى» ءوتتى.

جارىسقا ەلىمىزدىڭ 14 وبلىسى مەن الماتى، استانا قالالارىنان، رەسەي، قىرعىزستان، تاجىكستان، تۇركيا جانە باسقا دا شەت مەملەكەتتەردەن جالپى سانى 150 سايگۇلىك قاتىستى، دەپ حابارلايدى الماتى وبلىسى اكىمىنىڭ باسپا ءسوز قىزمەتى.

تۇلپارلار جارىسى قۇنان بايگە، توپ بايگە، جورعا جارىس، ۇشقىر اتتار جارىسى، الامان بايگە تۇرلەرىنەن ءوتتى.

جالپى جۇلدە قورى 63,6 ميلليون تەڭگەنى قۇرادى. جارىستىڭ قورىتىندىسىندا قۇنان بايگەدە الماتى وبلىسىنىڭ «دوران» اتتى جۇيرىگى وزىپ شىقسا، توپ بايگەدە دە جەتىسۋلىق «سۇلىكقاراسى» مارە سىزىعىن ءبىرىنشى بولىپ كەستى، اقمولالىق م. مۇستافايەۆتىڭ «ەلۆۋتزەت» تۇلپارى جورعا جارىستا وزگەلەردەن وق بويى وزىق شىقتى. 25 شاقىرىمدىق الامان بايگەنىڭ ءبىرىنشى جۇلدەسىن اتىراۋ وبلىسىنان كەلگەن د. مىرزاحانوۆتىڭ «جەلقانات» اتتى جۇيرىگى يەلەنىپ، 10 ميلليون تەڭگە اقشالاي سىيلىققا يە بولدى.

جالپى جارىستىڭ بارلىق تۇرلەرىنىڭ ءارقايسىسىنان بەس ورىنعا بايگە بەرىلىپ، جەڭىمپازداردىڭ بارلىعىنا اقشالاي جۇلدەلەر ۇسىنىلدى. سونىمەن قاتار جارىس اراسىندا تەڭگە ءىلۋ، جامبى اتۋ، قىز قۋۋ، تازى يتتەر جارىسى سياقتى سپورت تۇرلەرىنەن ويىندار كورسەتىلدى. جالپى، شارانىڭ ۇيىمداستىرۋشىلارى قاتارىندا الماتى وبلىسىنىڭ اكىمدىگى دە بار ەكەنىن اتاپ ءوتۋ كەرەك.