ابايدىڭ 150 ولەڭىن جاتقا بىلەتىن ارۋ «سەن سۇلۋ» بايقاۋىنىڭ جەڭىمپازى اتاندى - كەسكىن

پاۆلودار. قازاقپارات - ابايدىڭ 150 ولەڭىن جاتقا بىلەتىن شارباقتى اۋدانى چيگيرينوۆ مەكتەبىنىڭ تۇلەگى «كرەندەل» بانكەت- حوللىندا وتكەن وبلىستىق «سەن سۇلۋ» سۇلۋلىق بايقاۋىنىڭ جەڭىمپازى اتاندى، دەپ حابارلادى pavlodarnews.kz.

بۇل 19 جاستاعى ءسانيا تەمىرحانوۆانىڭ ەكىنشى جەڭىسى - وتكەن جىلدىڭ جەلتوقسان ايىندا ول وڭىرلىك سۇلۋلىق بايقاۋىندا باس جۇلدەگە يە بولعان. قازىر ءسانيا پاۆلودار مەملەكەتتىك پەداگوگيكالىق ينستيتۋتىندا ءۇشىنشى كۋرستا وقيدى، بولاشاعىن جۋرناليستيكامەن بايلانىستىرعىسى كەلەدى.

بايقاۋدا پ م پ ي- دىڭ تاعى ءبىر ستۋدەنتى - ايجان عازيزوۆا ءبىرىنشى ورىندى يەلەنىپ، «Lounge-bar karaoke CAMELOT»  اتىنان 100 مىڭ تەڭگەلىك سەرتيفيكاتقا يە بولدى. مۋزىكالىق مەكتەپتىڭ تۇلەگى دومبىرا مەن فورتەپيانودا شەبەر وينايدى جانە ءتورت ءتىلدى جەتىك مەڭگەرگەن.

ەكىنشى ورىن ايدا بايتەمىروۆاعا بەرىلدى. س. تورايعىروۆ اتىنداعى پ م ۋ ماشينا جاساۋ فاكۋلتەتىنىڭ 20 جاستاعى ستۋدەنتى بيمەن جانە سپورتپەن اينالىسادى. بايقاۋ كەزىندە قايىرجان ەسىمدى جاس جىگىت ايداعا سەزىمىن ءبىلدىرىپ، ۇلكەن ايۋ مەن گۇل شوعىن سىيلادى.

سايىستىڭ ەڭ جاس قاتىسۋشىسى - 14 جاستاعى ليليا يۆانوۆا ءۇشىنشى ورىنعا تۇراقتادى. چەرنويارسك مەكتەبىنىڭ وقۋشىسى ءوزىنىڭ جان- جاقتى، جاڭالىققا جانى قۇمار جان ەكەنىن كورسەتتى.

كورەرمەندەر كوزايىمى اتالىمىندا «RosModel» مودەلدىك اگەنتتىگىنىڭ وقۋشىسى كاميلا جاپاروۆا لايىق دەپ تانىلدى.