الماتىدا ق ر مەملەكەتتىك حاتشىسى ءا. بوكەيحانوۆتىڭ 150 جىلدىعىنا ارنالعان كونفەرەنسياعا قاتىستى
كونفەرەنسيا جۇمىسىن باستاي وتىرىپ، ءوزىنىڭ العى سوزىندە ق ر مەملەكەتتىك حاتشىسى گۇلشارا ءابدىحالىقوۆا قازاق حالقىنىڭ ۇلت- ازاتتىق سانا- سەزىمىن قالىپتاستىرۋدا ءا. بوكەيحانوۆتىڭ سىڭىرگەن ەڭبەگى وراسان زور ەكەندىگىن باسا ايتتى.
«كورنەكتى ساياسي قايراتكەر، ەتنوگراف، جۋرناليست ءاليحان بوكەيحانوۆ ءوزىنىڭ بۇكىل سانالى عۇمىرىن قازاق حالقىن ازات ەتۋگە جانە دامىتۋعا جۇمسادى. ول «الاش» ۇلت- ازاتتىق قوزعالىسىن باسقارا وتىرىپ، ۇلتتىق مەملەكەتتىلىكتى دامىتۋ يدەياسىن نەگىزدەدى. تاۋەلسىز قازاق مەملەكەتىن قۇرۋدى الدىنا ماقسات ەتىپ قويدى. وسى ماقساتقا جەتۋدىڭ جولدارى مەن ادىستەرىن ايقىندادى»، - دەدى گ. ءابدىحالىقوۆا.
بۇگىنگى شارا بارىسىندا ءا. بوكەيحانوۆتىڭ جازعان ەڭبەكتەرىنە ارنالعان كىتاپ كورمەسى ۇيىمداستىرىلدى. سونداي- اق، جاڭا «ايقاپ» جۋرنالىنىڭ تۇساۋى كەسىلدى. ايتا كەتەلىك، بۇل جۋرنالدى العاش رەت 1911 -جىلى بەلگىلى جازۋشى ءارى پۋبليتسيست مۇحامەدجان سەرالين شىعارعان بولاتىن.
«ءا. بوكەيحانوۆتىڭ مەرەيتويى - بۇل ادەبيەت، پۋبليتسيستيكا جانە شىعارماشىلىق مەرەكەسى. «جاقسىنىڭ اتى ولمەيدى، عالىمنىڭ حاتى ولمەيدى» دەگەندەي، ءاليحان بوكەيحانوۆتىڭ دا ەسىمى حالىق جادىندا ماڭگىلىك ساقتالادى»، - دەدى ءوز سوزىندە الماتى اكىمى باۋىرجان بايبەك.
سونىمەن قاتار، قالا باسشىسى الماتى قالاسىنىڭ 1000 جىلدىق مەرەيتويىنا وراي، الماتى قالاسى تاريحىنىڭ مۇراجايى جاڭا عيماراتقا كوشىرىلگەندىگىن، وندا الداعى ۋاقىتتا كوپشىلىك نازارىنا جاڭا جادىگەرلەر ۇسىنىلاتىندىعىن ايتتى.
كونفەرەنسيا جۇمىسىنا ق ر پارلامەنتى سەناتىنىڭ دەپۋتاتى، قازاقستان جازۋشىلار وداعىنىڭ ءتوراعاسى نۇرلان ورازالين، قازۇۋ رەكتورى، تەحنيكا عىلىمدارىنىڭ دوكتورى عالىم مۇتانوۆ، باسقا دا عىلىم، ءبىلىم جانە مادەنيەت قايراتكەرلەرى، سونداي- اق، قالاداعى جوعارى وقۋ ورىندارىنىڭ ستۋدەنتتەرى قاتىستى.
اۆتور: قانات مامەتقازى ۇلى
