ءا. بوكەيحانوۆتىڭ 150 جىلدىق مەرەيتويى مەملەكەتتىك دەڭگەيدە لايىقتى اتالىپ ءوتىلۋى كەرەك - دەپۋتات م. باقتيار ۇلى
بۇگىن سەناتتىڭ جالپى وتىرىسىندا دەپۋتات مۇرات باقتيار ۇلى وسى ماسەلەنى كوتەردى.
«بيىل قيىن- قىستاۋ كەزەڭدە ۇلت مۇددەسىن قورعاپ، ەل تاۋەلسىزدىگى جولىندا ساياسي قۇربانعا اينالعان الاشوردا باسشىسى، حالقىنىڭ اياۋلى ۇلى ءاليحان بوكەيحانوۆتىڭ تۋعانىنا 150 جىل تولىپ وتىر. بىلتىر يۋنەسكو باس كونفەرەنسياسىنىڭ 38 -سەسسياسىندا مەملەكەت جانە قوعام قايراتكەرى ءا. بوكەيحانوۆتىڭ 150 جىلدىق مەرەيتويىنا ارنالعان مەرەكەلىك شارالارعا قاتىسۋ تۋرالى ۇسىنىس بەكىتىلدى. قازاق حالقىنىڭ اياۋلى ۇلى ءا. بوكەيحانوۆتىڭ 150 جىلدىق مەرەيتويى يۋنەسكو اياسىندا، حالىقارالىق دەڭگەيدە وتەتىندىگى بۇل ونىڭ الەمدىك تۇلعا رەتىندە مويىندالعانىن بىلدىرەدى»، - دەدى سەناتور.
ءا. بوكەيحانوۆ الاش پارتياسىن قۇرۋشى، ۇلتتىق الاشوردا اۆتونوميالىق رەسپۋبليكاسىن ۇيىمداستىرعان قايراتكەر، عۇلاما عالىم، تاريحشى، ەتنوگراف، اۋدارماشى، ادەبيەتتانۋشى، دارىندى پرۋبليتسيست. الاشتىڭ داڭقتى پەرزەنتى ءا. بوكەيحانوۆ قازاق كوسەمسوزىنىڭ باستاۋىندا تۇرىپ، ۇلتتىق باسپا ءسوزدىڭ قالىپتاسۋىنا دا زور ۇلەس قوستى.
«ءا. بوكەيحانوۆ «الاش» ءسوزىن العاش رەت ساياسي اينالىمعا الىپ شىعىپ، الاش پارتياسى مەن ۇكىمەتىن تاريح ساحناسىنا كوتەرگەن قايراتكەر. ول جەتەكشىسى بولعان الاش پارتياسى بۇكىل رەسەيدىڭ ساياسي كەڭىستىگىندە بەلسەندى قىزمەت اتقارىپ، 50 دەن استام پارتيانىڭ ىشىندە 8- ورىندا تۇرعان بەدەلدى ۇلتتىق ۇيىمعا اينالعان ەدى. تاۋەلسىزدىگىمىزدىڭ 25 جىلدىعىن كەڭىنەن اتاپ وتكەلى تۇرعان بيىلعى جىلى الاش قايراتكەرىنىڭ دە 150 جىلدىق مەرەيتويىن مەملەكەتتىك دەڭگەيدە دە اتالىپ وتىلسە يگى»، - دەدى م. باقتيار ۇلى.
بۇل رەتتە سەناتور الاش كوشباسشىسىنىڭ مەرەيتويىن ءتيىستى مەملەكەتتىك دارەجەدە، حالىقارالىق دەڭگەيدە اتاپ ءوتۋ ءۇشىن ارنايى كوميسسيا قۇرۋ قاجەتتىگىن العا تارتادى. بۇدان بولەك، دەپۋتات قازاقستانداعى جوعارى وقۋ ورىندارىنىڭ بىرىنە ءا. بوكەيحانوۆتىڭ ەسىمىن بەرۋدى، استانا قالاسىنىڭ سول جاعالاۋىنداعى ۇلكەن داڭعىلداردىڭ بىرىنە ۇلت كوسەمىنىڭ اتىن بەرۋدى جانە وندا قايراتكەردىڭ ەسكەرتكىشىن ورناتۋدى ۇسىنادى.
«بۇدان بولەك، ءا. بوكەيحانوۆتىڭ تۋعان جەرىنە مەموريالدىق كەشەن ورناتىلسا يگى. سونىمەن قاتار، ماسكەۋدەگى دانسكوي قورىمىندا جاتقان ءاليحاننىڭ توپىراعىن استاناداعى ۇلتتىق ءقابىرستانعا قايتا جەرلەۋ شارالارىن ۇيىمداستىرعان دا ورىندى. قاراعاندى قالاسىنداعى ورتالىق داڭعىلداردىڭ بىرىنە دە قايراتكەر ەسىمىن بەرۋدى ويلاستىرۋ قاجەت. ءا. بوكەيحانوۆتىڭ كوپتومدىق شىعارمالارى مەن ونىڭ ءومىرى مەن قوعامدىق قىزمەتىنە قاتىستى ارحيۆتەردەگى تاريحي قۇجاتتار جيناعىن شىعارۋ دا ءلازىم. الاش كوشباسشىسىنىڭ يگى ىستەرىن ۇرپاقتىڭ جادىندا ماڭگىلىك قالدىرۋ ماقساتىندا ونىڭ ءومىرى مەن شىعارماشىلىعىنا، قايراتكەرلىك قىزمەتىنە قاتىستى فيلم تۇسىرىلسە»، - دەدى م. باقتيار ۇلى.
اۆتور: قانات مامەتقازى ۇلى
