شىمكەنتتە كوگەرشىن وسىرۋشىلەردىڭ حالىقارالىق فورۋمىنا 150 ادام قاتىستى - فوتو
سيرەك كەزدەسەتىن قۇستاردىڭ تۇقىمدارىن سەلەكسيالاندىرۋ جايى دا قارالىپ، ءوز تاجىريبەلەرىمەن ءبولىستى، دەپ حابارلادى otyrar.kz.
كوگەرشىننىڭ جايىن ءبىر كىسىدەي بىلەتىن قۇسبەگىلەر، ەڭ الدىمەن، سۇلۋ قۇستىڭ سىرتقى تۇرقىنا قاتىستى تاپسىرمالاردى انىقتادى. نەگىزگى جۇمىس جوسپارىن بەكىتۋ قىزۋ تالقىعا تولى بولدى. قۇرىلعانىنا ءۇش جىل بولعان قاۋىمداستىق مۇشەلەرى سودان بەرى كوگەرشىن ءوسىرۋدى جالپى ستاندارتتارىن انىقتاۋ بويىنشا ءبىرقاتار شارۋالار اتقارىپتى.
باقىت بارتەكەيەۆ، «گۇلسار» كلۋبىنىڭ ءتوراعاسى: «ءبىز فورۋمدى نە ءۇشىن ۇيىمداستىردىق؟ ەڭ الدىمەن، قازاقستان كلۋبتارىن بىرىكتىرۋ ءۇشىن. بىزدە ءبارى بار. مىقتى يتتەر دە، سۇلۋ اتتار دا بار. اسەم كوگەرشىندەرىمىز دە بولۋى كەرەك. كوگەرشىن - بۇل بەيبىتشىلىكتىڭ، ساتتىلىك پەن ىرىس- بەرەكەنىڭ سيمۆولى. ءبىزدىڭ بارلىعىمىز دا ءبىر تۋدىڭ، قازاقستان تۋىنىڭ استىنا جينالۋىمىز كەرەك.»
فورۋم كەزىندە ساندىك كوگەرشىندەر قاۋىمداستىعىنىڭ تولىق قۇرامى جاريالاندى. وعان فەليكس كلۋگمان پرەزيدەنتتىك ەتەدى. قاۋىمداستىقتىڭ باسقارۋ كەڭەسىنە ەلدىڭ وزىق كلۋبتارىنىڭ جەتەكشىلەرى مەن وزبەكستاندىق، رەسەيلىك، امەريكالىق كوگەرشىن وسىرۋشىلەردىڭ بىرلەستىكتەرى كىردى. فورۋم قورىتىندىسىندا كوگەرشىن وسىرۋشەلەردىڭ تاياۋ ۋاقىتتاعى جوسپارىن رەگلامەنتتەيتىن دەكلاراتسيا قابىلداندى.
اتابەك يۋسۋپوۆ، ق ر كوگەرشىن ءوسىرۋ قاۋىمداستىعىنىڭ باسپا ءسوز- اتتاشەسى:
«فورۋمعا قاتىسۋعا 150دەي ادام كەلدى. كوپ ادامنىڭ كەلگەنىنە قۋانىشتىمىز. شاقىرىلعان مەيمانداردىڭ بارلىعى دا قاتىستى. جەرگىلىكتى كوگەرشىن وسىرۋشىلەر دە جينالدى. ءبىزدىڭ قاۋىمداستىقتىڭ باستى ماقساتى - وسى ىسكە جاستاردى كوبىرەك تارتۋ. وسكەلەڭ ۇرپاقتىڭ كوگەرشىن وسىرۋگە دەگەن قىزىعۋشىلىعىن وياتۋ. مۇنداي جانداردىڭ قاتارى جىل سايىن ارتىپ كەلەدى.»
قوناقتار مەن بەلسەندى فورۋم قاتىسۋشىلارىن ماراپاتتاۋ مەيماندوس جاعدايدا ءوتتى. قاۋىمداستىق جەتەكشىلەرى بارلىق قاتىسۋشىلارعا سىيلىقتار مەن جۇلدەلەر بەردى. ساندىك كوگەرشىن ءوسىرۋ تاريحىندا العاش رەت ون قاتىسۋشىعا «قازاقستان رەسپۋبليكاسىندا كوگەرشىن ءوسىرۋدى دامىتۋعا قوسقان ۇلەسى ءۇشىن» مەدالى تابىستالدى.
