قازاقستاندا مەديتسينالىق پويىز 150 دەن استام ستانسا حالقىن تەكسەرۋدەن وتكىزەدى
بۇل تۋرالى قازاقپاراتقا قر ءىىم توتەنشە جاعدايلار كوميتەتى «اپاتتار مەديتسيناسىنىڭ تەمىرجول گوسپيتالدارى» اق- نىڭ باسقارما ءتوراعاسى، مەديتسينا عىلىمىنىڭ دوكتورى سەرىك دانبايەۆ ءمالىم ەتتى.
«ءاربىر شالعايداعى ستانسالارداعى مەديتسينالىق پويىزداردىڭ جۇمىسى - بۇل سوناۋ 2010 - جىلى باستاۋ العان اۋقىمدى الەۋمەتتىك جوبانىڭ شاعىن بولىگى عانا. اعىمداعى جىلدىڭ 23 - ناۋرىزى كۇنى استانا ستانساسىنان ءبىر مەزەتتە «مەنىڭ قازاقستانىم» يميدجدىك پويىزى مەن «سالاماتتى قازاقستان» مەديتسينالىق پويىزى جولعا شىقتى.
سونىمەن قاتار وسى اكسيا اياسىندا ەلىمىزدىڭ وڭتۇستىك جانە باتىس وڭىرلەرىندە «دەنساۋلىق» پەن «جاردەم» پويىزدارى دا ءوز جۇمىستارىن باستادى. ولاردىڭ بارلىعى دا زاماناۋي جوعارى تەحنولوگيالىق مەديتسينالىق قۇرال- جابدىقتارمەن جابدىقتالىپ، بىلىكتى مەديتسينالىق كادرلارمەن قامتاماسىز ەتىلگەن. مەديتسينالىق پويىزداردىڭ ارقاسىندا شالعايداعى ستانسالار مەن رازەزدەردىڭ 10 مىڭنان استام ادامى دياگنوستيكالىق تەكسەرۋدەن ءوتىپ، ءبىزدىڭ اكتسونەرلىك قوعمنىڭ بىلىكتىلىگى جوعارى مامانداردان تەگىن كەڭەس پەن ەم الادى. اعىمداعى جىلى مەديتسينالىق پويىزدار ءوز جۇمىستارىن تەك قاراشا عانا اياقتايدى»، - دەدى س. دانبايەۆ.
ونىڭ اتاپ وتۋىنشە، قازىرگى ۋاقىتقا دەيىن مەديتسينالىق پويىزداردىڭ ماماندارى اقتوبە، قاراعاندى، الماتى وبلىستارىنىڭ 6 ستانساسىندا تۇراتىن شامامەن 2 مىڭ تۇرعىندى تەكسەرۋدەن وتكىزگەن. 6 مىڭنان استام دياگنوستيكالىق تەكسەرۋ جۇرگىزىلىپ، 69 شاعىن امبلۋاتورلىق وتا جاسالعان. سونىمەن قاتار 1393 ناۋقاس تىركەلسە، ونىڭ 227 سى بالالار.
«رەسپۋبليكانىڭ بارلىق حالقىنا ساپالى مەديتسينالىق كومەكتىڭ قولجەتىمدىلىگىن ارتتىرۋ سىندى مۇنداي اۋقىمدى اكتسيانىڭ ماقساتى ەلباسى جولداۋىنىڭ نەگىزگى ەرەجەلەرىمەن، جالپىحالىقتىق «ماڭگىلىك ەل» يدەياسىمەن، «سالاماتتى قازاقستان» مەملەكەتتىك باعدارلاماسىمەن ۇندەسىپ جاتىر.
«قازاقستان تەمىر جولى» ۇلتتىق كومپانياسىمەن بىرلەسىپ، مەديتسينالىق پويىزداردى جولعا شىعارۋ بۇگىندە يگى داستۇرگە اينالعان. شالعايداعى ستانسالار مەن رازەزدەردىڭ تۇرعىندارىنان كەلىپ ءتۇسىپ جاتقان مىڭداعان العىس حاتتار جۇرگىزىلىپ وتىرعان اكسيانىڭ الەۋمەتكە ارنالعاندىعىن دالەلدەي تۇسەدى»، - دەدى ول.
اۆتور: مارلان جيەمباي
