قاڭتار وقيعاسى: 1500 ادام راقىمشىلىققا ىلىگەدى

«قاڭتار وقيعاسى - ەلىمىز ءۇشىن ۇلكەن قاسىرەت. ول كۇندەرى مەملەكەت تۇتاستىعى، تاۋەلسىزدىگى مەن قاۋپسىزدىگى قاتەر الدىندا تۇردى. پرەزيدەنت دەر ۋاقىتتا شەشىمدەر قابىلداپ، ەلىمىزدى ساقتاپ قالدى. مەملەكەت باسشىسى تاپسىرماسىمەن بۇل وقيعانىڭ سەبەپتەرى مەن سالدارى قارالىپ جاتىر»، - دەدى ول باس پروكۋراتۋرانىڭ بيىلعى جۇمىسىن قورىتىندىلاۋعا ارنالعان باسپا ءسوز ءماسليحاتىندا.

ونىڭ اتاپ وتۋىنشە، وقيعانىڭ باستى سەبەپتەرى - الەۋمەتتىك پروبلەمالار، جۇمىسسىزدىق، كىرىستەردىڭ ازايعانى. بۇل جاعدايدى دەسترۋكتيۆتى كۇشتەر، كريميناليتەت، راديكالدى ەلەمەنتتەر پايدالانىپ كەتكەن.

«ولار ادامداردى ءىس- جۇزىندە اگرەسسيا مەن قاتال ارەكەتتەرگە ارانداتقان. تارتىپسىزدىك جاساعان ادامداردىڭ كوپشىلىگى - جاستار. ولار ارەكەتتەرى قانداي اۋىر سالدارعا اكەپ سوعاتىنىن تۇسىنبەگەن. كوپ جاستار ءوز قاتەلىكتەرىن ءتۇسىنىپ، وكىنىپ ءجۇر»، - دەدى تيمۋر تاجىمبايەۆ.

باس پروكۋروردىڭ ءبىرىنشى ورىنباسارى وسىعان وراي قاراشادا پرەزيدەنت «راقىمشىلىق تۋرالى» زاڭعا قول قويعانىن اتاپ ءوتتى.

«امنيستيا ءبىر جارىم مىڭ ادامعا قاتىستى. قازىرگى ۋاقىتتا 991 ازاماتتىڭ جازا مەرزىمى جەڭىلدەدى. 94 ادام قىلمىستىق جاۋاپتان بوساتىلدى. مىنانى ەسكەرە كەتسەم دەيمىن، تارتىپسىزدىك ۇيىمداستىرعان ادامدار، ازاپتاۋ، ەكسترەميزم، تەرروريزم، مەملەكەتكە وپاسىزدىق جاساعاندار امنيستياعا ىلىكپەيدى»، - دەدى ول.

ەسكە سالساق، بۇعان دەيىن قاڭتار وقيعاسىنا قاتىسقان 1 مىڭنان استام ادامعا راقىمشىلىق جاسالعانى تۋرالى حابارلاعان بولاتىنبىز.