مەرەكە قارساڭىندا قوجا احمەت ياساۋي كەسەنەسىندە 1500 دەن اسا بالا تاماشالادى
ولاردىڭ اراسىندا مالايزيادان، رەسەيدەن، وزبەكستاننان جانە قىرعىزستاننان كەلگەن جەتكىنشەكتەر بولدى، دەپ حابارلايدى قازاقپارات ءتىلشىسى.
تاڭەرتەڭنەن كەسەنەگە اعىلعان بالالارعا ارنايى ەكسكۋرسيا ۇيىمداستىرىلىپ، تايقازان، ۇلكەن اقساراي، كىشى اقساراي، اسحانا مەن قۇدىقحانا بولمەلەرى كورسەتىلدى. سونداي-اق، تاريحي تۇلعالار جايلى مالىمەت بەرىلىپ، ءرابيا سۇلتان بەگىم انا، جەراستى قىلۋەتى مەن شىعىس مونشالارى تانىستىرىلدى.
ايتا كەتەيىك، «ازىرەت سۇلتان» مەملەكەتتىك تاريحي-مادەني قورىق-مۋزەيى ەلىمىزدەگى ىرگەلى مۋزەيلەردىڭ ءبىرى رەتىندە مەكتەپ ءتۋريزمىن دامىتۋ، وقۋشىلارمەن بايلانىس ماسەلەلەرىنە دە جەتە ءمان بەرىپ كەلەدى. وسى ورايدا ورتا جانە ارناۋلى ورتا ءبىلىم بەرۋ مەكەمەلەرىندە ءتۇرلى تاقىرىپتاردا لەكتسيالار وتكىزىلىپ، مۇراجاي ەكسپوزيتسياسى الاڭدارىندا ءتۇرلى تاقىرىپتاعى كورمەلەر ۇيىمداستىرادى. كوشپەلى كورمەلەر ەلىمىزدىڭ بارلىق وبلىستارى مەن اۋدان-قالالارىن قامتيدى.
سونىمەن قاتار، مەكتەپ وقۋشىلارىنىڭ «ازىرەت سۇلتان» قورىق-مۋزەيىنە جازعى جانە توقساندىق دەمالىس كۇندەرى تەگىن كىرۋى مۇمكىندىگى قاراستىرىلعان. جىل باسىنان بەرگى ءتورت اي ىشىندە مۋزەيدى 61343 وقۋشى تەگىن تاماشالاۋعا مۇمكىندىك العان.
بۇدان بولەك، قىركۇيەك ايىنىڭ بىرىنە دەيىن كەز-كەلگەن وقۋشى «ازىرەت سۇلتان» قورىق-مۋزەيىنە تەگىن كىرە الادى. ولار ەلباسى ن. ءا. نازاربايەۆتىڭ «سيفرلى قازاقستان» جوباسى نەگىزىندە قوجا احمەت ياساۋي كەسەنەسىندە شاعىن كينوزالعا كەلىپ، تاريحي جانە دەرەكتى، انيماتسيالىق فيلمدەردى تاماشالاي الادى.