تاۋەلسىزدىك مەرەكەسى قارساڭىندا 1500 باتىس قازاقستاندىق پاتەرلى بولادى - فوتو، كەسكىن
بۇل تۋرالى باتىس قازاقستان وبلىسىنىڭ اكىمى التاي كولگىنوۆ ءمالىم ەتتى، دەپ حابارلايدى قازاقپارات.
اكىمنىڭ ايتۋىنشا، وسى ماقساتقا بيىل 17 ميلليارد تەڭگە بولىنسە، سونىڭ 5 ميلليارد تەڭگەسى ينجەنەرلىك كوممۋنيكاتسيالاردى تارتۋ مەن اباتتاندىرۋعا، قالعانى تۇرعىن ءۇي قۇرىلىسىنا جۇمسالادى. مىسالى، ورالعا قاراستى زاچاگان كەنتىندەگى اتىراۋ مەن ساراتوۆ جولدارىنىڭ ارالىعىنداعى جاڭا شاعىناۋداندا بەس قاباتتى 5 تۇرعىن ءۇي (500 پاتەر) سالىنۋدا.
«سونداي- اق وڭىردەگى باس شاھاردىڭ وزگە شاعىناۋداندارىندا، اقساي قالاسى مەن اۋدانداردا جاڭا ۇيلەر بوي كوتەرۋدە. بۇلاردىڭ ءبىرقاتارى وسىعان دەيىن تاپسىرىلدى. قالعان سەگىز ءۇيدىڭ قۇرىلىسى جەلتوقسان ايىندا مارەگە جەتەدى. ولاردىڭ ساپاسىن ۇدايى قاداعالاۋدامىز. جاڭا پاتەرلەردىڭ باسىم كوپشىلىگى كەزەكتە تۇرعان ازاماتتارعا بەرىلەدى. تاعى ءبىر ايتا كەتەتىن جايت، وسى قۇرىلىس بارىسىندا 1500 گە جۋىق جۇمىس ورنى اشىلدى. مۇنىڭ ءبارى ەلباسى تاپسىرماسىنا سايكەس جاسالۋدا. 1500 پاتەر از ەمەس، بۇل ءبىزدىڭ تاۋەلسىزدىكتىڭ تورقالى تويىنا تارتار ەرەكشە سىيىمىز بولماق»، دەدى التاي كولگىنوۆ.
ايتا كەتەيىك، زاچاگان كەنتىنىڭ تۇرعىندارى اتالعان جاڭا شاعىناۋداندى «الاش» دەپ اتاۋ جونىندە ونوماستيكالىق كوميسسياعا ۇسىنىس ءبىلدىردى.
