جانار-جاعارماي ۇرلاعان 14 اسكەري قىزمەتكەرگە سوت ۇكىمى شىقتى

اقتوبە. قازاقپارات - اقتوبە گارنيزونىنىڭ اسكەري سوتىندا 14 سوتتالۋشىعا قاتىستى قىلمىستىق ءىس بويىنشا ۇكىم شىقتى، دەپ حابارلايدى قازاقپارات اسكەري سوتتىڭ باسپا ءسوز قىزمەتىنە سىلتەمە جاساپ.
None

ولار قىلمىستىق كودەكستىڭ 189-بابى 4-بولىگىنىڭ 2-تارماعى، 189-بابى 3-بولىگىنىڭ 1، 2، 3-تارماقتارى، 190-بابى 3-بولىگىنىڭ 2-تارماعى، 28-بابى 4 بولىگى، 367-بابى 2-بولىگىمەن سوتتالدى.

اتاپ ايتقاندا، سوتتالۋشىلار 2019-2020-جىلدارى وزدەرىنىڭ قىزمەتتىك جاعدايىن پايدالانا وتىرىپ، جەكە باستارىن بايىتۋ ماقساتىندا بىرنەشە رەت، الدىن الا ءسوز بايلاسۋ ارقىلى ادامدار توبىمەن، ولارعا سەنىپ تاپسىرىلعان اسكەري بولىمگە تيەسىلى مۇلىك - جانار-جاعارمايدى يەمدەنىپ، مەملەكەتكە ءىرى كولەمدە زالال كەلتىردى.

سوتتالۋشىلار دالەلدەمەلەردىڭ جوقتىعىنا جانە قىلمىستىق پروتسەستىك كودەكس نورمالارىنىڭ كوپتەگەن زاڭبۇزۋشىلىقتارىنا سىلتەمە جاساي وتىرىپ، ءوز كىناسىن مويىنداماي، اقتاۋدى سۇرادى.

مەملەكەتتىك ايىپتاۋشى تاعىلعان ايىپتى تولىعىمەن قولدادى جانە ءبىر سوتتالۋشىعا قاتىستى ق ك- ءنىڭ 189-بابى 3-بولىگىنىڭ 3-تارماعىن الىپ تاستادى.

كىنا سوتتالۋشىلاردىڭ ءبىرى بەرگەن قالعان قاتىسۋشىلاردىڭ ارەكەتىن اشكەرەلەيتىن ايعاقتارمەن، ەكونوميكالىق، فونوگرافيالىق جانە پسيحولوگيالىق-كريميناليستيكالىق ساراپتامالاردىڭ قورىتىندىلارىمەن، 40 تان استام كۋاگەردىڭ ايعاقتارىمەن، تەلەفون ارقىلى سويلەسۋلەردىڭ ستەنوگراممالارىمەن، اقشا قاراجاتىنىڭ اۋدارىمدارىمەن، سونداي-اق قورعانىس مينيسترلىگىنىڭ مەملەكەتتىك قارجى ينسپەكتسياسىنىڭ ماماندارى جاساعان كەلتىرىلگەن زالال سوماسىن ەسەپتىك راستاۋمەن دالەلدەنەدى.

سوت ۇكىمىمەن 14 سوتتالۋشى كىنالى دەپ تانىلىپ، مۇلكىن تاركىلەمەي، اسكەري اتاقتار مەن مەملەكەتتىك ماراپاتتارىنان ايىرىپ، مەملەكەتتىك قىزمەتتە قىزمەت اتقارۋ قۇقىعىنان ءومىر بويىنا ايىرا وتىرىپ، ءارقايسىسىنا 3 جىل 6 ايدان 8 جىلعا دەيىن باس بوستاندىعىنان ايىرۋ جازاسى تاعايىندالدى.

جازا تاعايىنداۋ كەزىندە سوت ايىپتالۋشىلارىڭ جاس بالالارىنىڭ بارىن قىلمىستىق جاۋاپتىلىق پەن جازانى جەڭىلدەتەتىن ءمان-جايلار دەپ تانىدى.

ال، انت بەرگەن ادامنىڭ قىلمىستىق، قۇقىق بۇزۋشىلىق جاساۋىن اۋىرلاتاتىن ءمان-جايلار رەتىندە تانىدى.

سونىمەن قاتار، قورعانىس مينيسترلىگىنىڭ ازاماتتىق تالاپ ارىزى ءىشىنارا قاناعاتتاندىرىلدى، سوتتالعانداردان مەملەكەتكە كەلتىرىلگەن زالال ورتاق تارتىپتە بارلىعى 48287301 تەڭگە جانە قازاقستان رەسپۋبليكاسىنىڭ جابىرلەنۋشىلەردىڭ وتەماقى قورىنا 20 ا ە ك (م ر پ) مولشەرىندە ءارقايسىنان، 55560 تەڭگە ءماجبۇرلى تولەم ءوندىرىلدى.

سوت ۇكىمى زاڭدى كۇشىنە ەنگەن جوق.

سوڭعى جاڭالىقتار