قازاقستاننان دارىلىك وسىمدىكتەردىڭ 14 ءتۇرى ەكسپورتتالادى
«قازاقستاندا اعاشتار مەن بۇتالاردىڭ جانە ءشوپتى وسىمدىكتەردىڭ 6 مىڭنان استام ءتۇرى بار. ونىڭ ىشىندە 1,5 مىڭعا جۋىعى دارىلىك وسىمدىكتەر ساناتىندا بولسا، 390 ءتۇرى قازاقستان رەسپۋبليكاسىنىڭ قىزىل كىتابىنا ەنگىزىلگەن، 110 ءتۇرى رەليكتى وسىمدىكتەر، سونداي-اق 700 دەن استام ەندەميكالىق وسىمدىك تۇرلەرى قامتىلعان. قازاقستاندا ەكسپورتتالاتىن دارىلىك وسىمدىكتەر تىزىمىنە 14 ءتۇرى كىرەدى، ياعني ولاردىڭ قاتارىندا ميا، ساسىر، سيستانحە جانە باسقالارى بار»، - دەدى ە. قۇتپانبايەۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
ونىڭ ايتۋىنشا، كەدەندىك ستاتيستيكا دەرەكتەرى بويىنشا ميا تامىرى نەگىزىنەن قىتاي، تۇركيا جانە ا ق ش نارىقتارىنا وتكىزىلىپ جاتىر. ماسەلەن، قىتايعا 2018-جىلدان باستاپ 2022-جىلعا دەيىن 40 مىڭ توننادان استام ميا تامىرى ەكسپورتتالدى.
«قاراۋسىز قولدانىلۋىنا بايلانىستى دارىلىك وسىمدىكتەردىڭ شيكىزات قورى تاۋسىلۋى مۇمكىن. دارىلىك وسىمدىكتەردى باقىلاۋسىز جيناۋ كولەمىنىڭ وسۋىنە سىرتقى نارىقتارداعى سۇرانىستىڭ ارتۋى ىقپال ەتىپ وتىر. 2023-جىلعا دەيىن ءتيىستى زاڭدار اياسىندا مەملەكەتتىك ورمان قورىندا، ونىڭ ىشىندە ەرەكشە قورعالاتىن تابيعي اۋماقتاردا جانە اۋىل شارۋاشىلىعىنا ارنالعان جەرلەردە وسىمدىك دۇنيەسىن قورعاۋ، ساقتاۋ، قالپىنا كەلتىرۋ ءارى پايدالانۋ ماسەلەلەرى رەتتەلگەن بولاتىن. دەگەنمەن 94 ميلليون گەكتار الاڭداعى بوسالقى جەر قورىندا دارىلىك وسىمدىك شيكىزاتى، كوپجىلدىق ەكپەلەر، گەنەتيكالىق جانە وزگە دە وسىمدىك رەسۋرستارى سياقتى ماسەلەلەر زاڭنامامەن رەتتەلمەگەن ەدى. وسىنىڭ سالدارىنان وسىمدىك رەسۋرستارىن ءتيىمسىز پايدالانۋ، ولاردىڭ ءوسۋ ورىندارىن جويۋ، ادام ەنگىزگەن بوتەن تۇرلەردىڭ جەرگىلىكتى وسىمدىكتەردى ىعىستىرۋى جاعدايى ورىن الدى»، - دەدى كوميتەت وكىلى.
ونىڭ سوزىنە قاراعاندا، بۇل ماسەلە وسىمدىكتەردىڭ ارتۇرلىلىگىنە كەرى اسەر ەتىپ، تابيعي ەكولوگيالىق جۇيەلەردىڭ دەگراداتسياسىنا اكەلۋى مۇمكىن.
«وسىعان وراي «وسىمدىكتەر دۇنيەسى تۋرالى» زاڭ ازىرلەنىپ، قابىلداندى. زاڭدى ازىرلەۋ كەزىندە حالىقارالىق تاجىريبە ەسكەرىلدى. وسىمدىكتەر دۇنيەسى تۋرالى ۇقساس زاڭدار اۋستراليادا، كانادادا، وڭتۇستىك كورەيادا جانە ەۋروپا وداعى ەلدەرىندە، امەنيادا، بەلارۋستە، قىرعىزستاندا، تۇرىكمەنستاندا، وزبەكستاندا جانە ۋكراينادا بار»، - دەدى ەرلان قۇتپانبايەۆ.
بۇدان بۇرىن حابارلانعانداي، بيىل 2- قاڭتار كۇنى مەملەكەت باسشىسى «وسىمدىكتەر دۇنيەسى تۋرالى» قازاقستان رەسپۋبليكاسىنىڭ زاڭىنا قول قويدى.
