قازاقستان اۋىر اتلەتتەرى ازيا چەمپيوناتىنان 14 مەدال جەڭىپ الدى
بۇل قۇرلىقتىق بىرىنشىلىككە قازاقستان اتىنان 20 سپورتشى قاتىستى، دەپ حابارلايدى قازاقپارات اۋىر اتلەتيكا فەدەراتسياسىنا سىلتەمە جاساپ.
قازاقستان قۇراماسىنىڭ قورجىنىنداعى «التىندى» قۇراما كوشباسشىلارىنىڭ ءبىرى ادىلەت ۇلى نۇرعيسا الىپ كەلدى.
102 كەلىگە دەيىنگى سالماقتا ءبىزدىڭ سپورتشىمىز 400 (181+219) كەلىنى باعىندىرىپ، جۇلقي كوتەرۋدە كۇمىس، سەرپە كوتەرۋدە جانە جالپى جاتتىعۋلاردا التىن جەڭىپ الدى.
109 كەلىگە دەيىنگى سالماق دارەجەسىندە ەكى قازاقستاندىق اۋىر زىلتەمىرشى بىردەن جەڭىس تۇعىرىنا كوتەرىلدى.
ارتەم انتروپوۆ التىدان بەس ءتاسىلدى ورىنداپ، قوسسايىس بويىنشا جالپى ەسەپتە ەكىنشى بولدى. ونىڭ ناتيجەسى - 399 (172+227) كەلى.
ۇزدىك ۇشتىكتى 390 (169+221) كەلى كورسەتكىشپەن انداس سامارقانوۆ تۇيىندەدى
55 كەلىگە دەيىنگى سالماق دارەجەسىندە ارلي چونتەي جۇلقي كوتەرۋدە «التىن» جۇلدەنى جەڭىپ الدى جانە قوسسايىستا ءۇشىنشى ورىنعا يەلەندى (117+141).
ەرلەر اراسىندا 73 كەلىگە دەيىنگى سالماق دارەجەسىندە ۇزدىك ۇشتىكتى قوستاناي اۋىر اتلەتيكا مەكتەبىنىڭ وقۋشىسى الەكسەي چۋركين تۇيىندەدى.
340 (154+186) كەلى - ونىڭ ناتيجەسى، سونداي- اق جۇلقي كوتەرۋدە كۇمىس مەدال.
سەيىتقازى ەلامان 81 كەلىگە دەيىنگى سالماق دارەجەسىندە ءبىرىنشى جاتتىعۋدا قارسىلاستارىن سەنىمدى تۇردە باسىپ وزدى.
جۇلقي كوتەرۋدە ءبىزدىڭ سپورتشىمىز 155 كەلىنى كوتەرىپ، بۇل جاتتىعۋدا التىنعا قول جەتكىزدى.
2016 -جىلعى وليمپيادا ويىندارىنىڭ قولا جۇلدەگەرى كارينا گوريچيەۆا 64 كەلىگە دەيىنگى سالماق دارەجەسىندە جۇلقي كوتەرۋدە كۇمىس جۇلدەنى جەڭىپ الدى (91+101).
ال ايشا وماروۆا (87 كەلى) سەرپە كوتەرۋدە قولا جۇلدەگەر اتاندى.
ەكى جاتتىعۋدىڭ قوسىندىسى بويىنشا اراي نۇرلىبەكوۆا (76 كەلى)، ايشا وماروۆا (87 كەلى)، ليۋبوۆ كوۆالچۋك (87+ كەلى)، سەرگەي پەتروۆيچ (89 كەلى) ۇزدىك ۇشتىكتەن ءبىر قادام قالىپ توقتادى.
وسىلايشا، ءبىزدىڭ قۇراما ءتورت التىن، بەس كۇمىس جانە بەس قولا مەدال جەڭىپ الدى.
كوماندالىق ەسەپتە قازاقستان رەسپۋبليكاسىنىڭ ەرلەر جانە ايەلدەر قۇراماسى ءتورتىنشى، ال مەدالدىق ەسەپتە ەرلەر قۇراماسى قىتاي قۇراماسىنان عانا ۇتىلىپ، ەكىنشى ورىندا تۇراقتادى، ايەلدەر قۇراماسى 11-ورىندا بولدى.
