باقىتگۇل حامەنوۆا ىسىنە قاتىستى سوت وتىرىسى 14- قاراشادا قايتا جالعاسادى
اتىراۋ وبلىسى اكىمىنىڭ بۇرىنعى ورىنباسارى باقىتگۇل حامەنوۆانىڭ ىسىنە قاتىستى سوت وتىرىسى بيىلعى 11- تامىزدا باستالدى.
ونىڭ ءىسى اتىراۋداعى 2№ قالالىق سوتتا قارالىپ جاتىر. ايىپتاۋ اكتىسى 55 بەتتەن تۇرادى.
وبلىستىق سوتتىڭ باسپا ءسوز قىزمەتىنىڭ اقپاراتىنا سۇيەنسەك، بيىلعى 26- مامىردا اتىراۋ قالاسىنىڭ 2№ سوتىنا ق ر قىلمىستىق كودەكسى 366-بابىنىڭ 3-بولىگى 2-تارماعىمەن اتىراۋ وبلىسى اكىمىنىڭ ورىنباسارى باقىتگۇل حامەنوۆاعا، اتىراۋ وبلىسى مادەنيەت، تىلدەردى دامىتۋ جانە ارحيۆ ءىسى باسقارماسىنىڭ باسشىسى اقىلبەك رىسقاليەۆكە، ق ر قىلمىستىق كودەسى 367-بابىنىڭ 2-بولىگىمەن «ب» ج ش س ديرەكتورىنا قاتىستى قىلمىستىق ءىس ءتۇستى.
ال، كەشە، 31- قازاندا وتكەن سوت وتىرىسىندا پروكۋروراتۋرا وكىلى وبلىس اكىمىنىڭ بۇرىنعى ورىنباسارى باقىتگۇل حامەنوۆانى 7 جىلعا باس بوستاندىعىنان جانە «قۇرمەت» وردەنىنەن ايىرۋدى ۇسىندى.
سونداي-اق، وبلىستىق مادەنيەت، تىلدەردى دامىتۋ جانە ارحيۆ ءىسى باسقارماسىنىڭ باسشىسى اقىلبەك رىسقاليەۆتى 7 جىلعا، پارا بەرۋ كۇدىگىنە ىلىنگەن ءومىرتاي اداموۆتى 4 جىلعا باس بوستاندىعىنان ايىرۋ جازاسىن سۇرادى.
ءبىراق، باقىتگۇل حامەنوۆا مەن اقىلبەك رىسقاليەۆتىڭ ادۆوكاتتارى پروكۋراتۋرا وكىلىنىڭ ايىبىمەن كەلىسپەيتىنىن ءبىلدىردى.
باقىتگۇل حامەنوۆا اتىراۋ وبلىسى اكىمىنىڭ ورىنباسارى لاۋازىمىنا 2020-جىلعى ناۋرىزدا تاعايىندالعان ەدى.
بىلتىرعى جەلتوقساندا ول تەرگەۋ يزولياتورىنا قاماۋعا الىندى.
وسىعان بايلانىستى بيىلعى تامىزدا وبلىس اكىمىنىڭ ورىنباسارى قىزمەتىنەن بوساتىلدى.
العاشقى سوت وتىرىسىندا باقىتگۇل حامەنوۆا وزىنە تاعىلعان ايىپتى مويىنداعان جوق.
سوت وتىرىسى 6- قىركۇيەكتە قايتا جالعاسىپ، وبلىس اكىمىنىڭ بۇرىنعى ورىنباسارى جىبەرگەن قاتەلىگى تۋرالى ايتتى.
بۇدان كەيىنگى سوت وتىرىسىندا باسقارما باسشىسى وعان جالا جاپقانىن جەتكىزگەن ەدى.
كەيىن باقىتگۇل حامەنوۆا تاعى دا تەرگەۋ يزولياتورىنان ءۇي قاماققا جىبەرىلمەگەنىن جازعان بولاتىنبىز.
