الماتىداعى ءورت: باسپاناسىز قالعان 14 وتباسىنا جاڭا پاتەر بەرىلەدى
بۇل تۋرالى مەگاپوليس اكىمى باقىتجان ساعىنتايەۆ Instagram-داعى پاراقشاسىندا جازدى. قالا اكىمى تۇرعىندارمەن بىرگە ارلەۋ جۇمىستارى ءجۇرىپ جاتقان جاڭا ءۇيدى قاراپ شىقتى.
«بۇگىن ورتتەن زارداپ شەككەن 14 وتباسىنىڭ ماسەلەسىنە نۇكتە قويىلدى. جەتىسۋ اۋدانى اقتولقىن كوشەسىندەگى ءۇي قالپىنا كەلتىرىلمەيدى. تۇرعىندارمەن بىرگە سالىنىپ جاتقان ۇيدەن جەرگىلىكتى بيۋدجەت قاراجاتى ەسەبىنەن ساتىپ الىناتىن جاڭا پاتەرلەردى قارادىق. كوشۋگە ءبىراز ۋاقىت قالدى. بولاشاق قونىس يەلەرىنە باقىت تىلەيمىز!»، - دەپ جازدى باقىتجان ساعىنتايەۆ.
جاڭا ءۇي دە جەتىسۋ اۋدانىندا ورنالاسقان. بۇعان دەيىن اكىم جەتىسۋ اۋدانىنداعى تۇرعىن ۇيدەن شىققان ءورتتىڭ سەبەپتەرىن انىقتاۋدى تاپسىرعان بولاتىن. ەسكە سالايىق، 13 - تامىز كۇنى الماتىدا 1943 -جىلى سالىنعان ەكى قاباتتى ءۇي ورتەنىپ، ءتورت ادام قۇتقارىلعان ەدى.