بەلارۋس پرەزيدەنتتىگىنە ەكس- كانديدات 14 جىلعا سوتتالدى
جوعارعى سوت ۇكىمدى 6-شىلدەدە جاريالادى، - دەپ حابارلايدى بەلتا اگەنتتىگى.
باباريكوعا اسا ءىرى مولشەردە پارا الىپ، سونداي-اق قىلمىستىق جولمەن الىنعان قاراجاتتى اسا ءىرى مولشەردە زاڭداستىردى دەگەن ايىپ تاعىلدى.
«قىلمىستار جيىنتىعى بويىنشا جازالاردى ءىشىنارا قوسۋ ارقىلى باباريكوعا 14 جىلعا باس بوستاندىعىنان ايىرۋ جازاسى تاعايىندالىپ، كۇشەيتىلگەن رەجيم جاعدايىندا تۇزەۋ كولونياسىندا 5 مىڭ بازالىق مولشەردە ايىپپۇل سالىپ، ۇيىمداستىرۋشىلىق، اكىمشىلىك جانە اكىمشىلىك-شارۋاشىلىق مىندەتتەرىن ورىنداۋمەن بايلانىستى لاۋازىمداردى اتقارۋ قۇقىعىنان بەس جىلعا ايىرۋ جازاسى تاعايىندالسىن»، - دەدى سۋديا يگور ليۋبوۆيسكي.
باباريكودان 47 ميلليون بەلورۋس رۋبلىنەن اسا قارجى وندىرىلگەن.
«باباريكودان الىنعان سۋرەتتەر دە قىلمىستىق جولمەن الىنعان كىرىستى تولەۋگە ارنالعان. «بەلگازپرومبانكتىڭ» مەنشىگى بولىپ تابىلاتىن سۋرەتتەر بانككە قايتارىلدى»، - دەدى باس پروكۋراتۋرانىڭ مەملەكەتتىك ايىپتاۋ ءبولىمىنىڭ اعا پروكۋرورى سەرگەي گيرگەل.
ۇكىم قايتا شاعىمداۋعا جاتپايدى جانە جاريا ەتىلگەن كەزدەن باستاپ زاڭدى كۇشىنە ەنەدى.
ايتا كەتەيىك، «بەلگازپرومبانك» توپ-مەنەدجەرلەرىنىڭ سوتى 17-اقپاندا باستالدى. ءىستى جوعارعى سوت قارادى. سوت ءىسى اشىق قاراستىرىلدى.
باباريكو «بەلگازپرومبانكتى» بىلتىر جاز مەزگىلىندە بەلارۋس پرەزيدەنتتىگىنە ۇمىتكەر بولۋعا شەشىم قابىلداعانعا دەيىن 20 جىل باسقاردى.
