مەملەكەتتىك باسقارۋدى دامىتۋ تۇجىرىمداماسىنىڭ 14 باعىتى ۇسىنىلدى
بۇل تۋرالى ق ر مەملەكەتتىك قىزمەت ىستەرى اگەنتتىگىنىڭ ءتوراعاسى انار جايىلعانوۆا ايتتى، دەپ حابارلايدى قازاقپارات ءتىلشىسى.
مەملەكەتتىك قىزمەت ىستەرى اگەنتتىگى قازىرگى كەزدە كادر ساپاسىن ارتتىرۋ جانە مەملەكەتتىك اپپاراتتى كاسىبيلەندىرۋ ماسەلەلەرىن شەشۋگە ارنالعان 14 جوبانى انىقتاعانىن، ولاردىڭ مازمۇنىن، مەرزىمىن جانە قاجەتتى قارجىلاندىرۋدى انىقتاۋ بويىنشا جۇمىستار جۇرگىزىلىپ جاتقانىن اتاپ وتكەن ءجون.
«ءبىرىنشى جوبا - مەملەكەتتىك قىزمەتكە قاتىستى دارىنداردى اشۋ جانە تاربيەلەۋ جۇيەسى. ەكىنشىسى - مەريتوكراتيا قاعيداتىن ساقتاي وتىرىپ، مەملەكەتتىك قىزمەتتىڭ «پوزيتسيالىق مودەلىن» ەنگىزۋ. وسى تۇرعىدان العاندا، «پوزيتسيالىق مودەل» مەملەكەتتىك قىزمەتشىلەر تەك ىشتەن ەمەس، سونىمەن قاتار سىرتتان دا تاڭدالاتىندىعىن بىلدىرەدى. ەگەر مەملەكەتتىك قىزمەتتە جوق، ءبىراق جاقسى ءبىلىم، قۇزىرەتتىلىك العان جاستار بولسا - ولار ءۇشىن مەملەكەتتىك قىزمەتكە جول اشىق بولادى»، - دەپ ءتۇسىندىردى اگەنتتىك ءتوراعاسى.
كەلەسى جوبا - ينكليۋزيۆتىلىك پەن يكەمدىلىك پرينتسيپتەرى بويىنشا مەملەكەتتىك ورگاننىڭ كادرلىق ستراتەگياسىن جانە كادرلىق جوسپارلاۋدى جۇزەگە اسىرۋ. «ءبىز تەك ىشتەن عانا تاڭدامايمىز، ءارتۇرلى سالاداعى ادامدار قاتىسادى. كوپ جاعدايدا مەملەكەتتىك قىزمەتكە ناقتى سالا ماماندارى جەتىسپەيدى. بۇل ماسەلەنى شەشۋ ءۇشىن پرينتسيپ ىسكە اسىرىلاتىن بولادى. ءتورتىنشى جوبا - HR جازبالارىن باسقارۋدى اۆتوماتتاندىرۋ. كەلەسى - ۇمىتكەرلەردىڭ كاسىبي جانە جەكە قۇزىرەتىنە نازار اۋدارا وتىرىپ، ىرىكتەۋ پروتسەدۋرالارىن جەتىلدىرۋ. التىنشى جوبا - بەلگىلى ءبىر ساياسي لاۋازىمدارعا ۇمىتكەرلەردىڭ قۇزىرەتىن باعالاۋدىڭ باعالاۋ ورتالىعى ءادىسىن ەنگىزۋ. اڭگىمە ۆيتسە- مينيسترلەر، وبلىس، اۋدان اكىمدەرىنىڭ ورىنباسارلارى تۋرالى بولىپ وتىر. شىن مانىندە، بۇل ادامدار بەلگىلى ءبىر بىلىكتىلىككە ساي بولۋى كەرەك. ولاردىڭ ءارتۇرلى جاعدايدا ءوزىن قالاي ۇستايتىنىن جانە تۇرعىندارمەن قالاي جۇمىس ىستەي الاتىنىن ءتۇسىنۋ ءۇشىن باعالاۋ ورتالىعى قاجەت»، - دەپ ءتۇسىندىردى انار جايىلعانوۆا.
ونىڭ ايتۋىنشا، اگەنتتىك «جاڭا فورماتسيا كوشباسشىسى» كۋرستارىن وتكىزەدى، وندا ولار دۇرىس كوممۋنيكاتسيا جۇرگىزۋدى، حالىقپەن جۇمىس ىسەۋدى، قازىرگى زامانعى تالاپتارعا جاۋاپ بەرەتىن ترانسفورماتسيالىق كوشباسشى قانداي بولۋ كەرەكتىگىن ۇيرەتەدى.
«جەتىنشى جوبا - مەملەكەتتىك قىزمەتشىلەردىڭ تيىمدىلىگىن جاڭا قۇندىلىقتار نەگىزىندە باعالاۋ جۇيەسىن جەتىلدىرۋ. سەگىزىنشى جوبا - پەرسونالدى ەتيكالىق باعالاۋدىڭ «360 گرادۋس» ءادىسىنىڭ سيفرلىق قوسىمشاسى. سونداي- اق، كەلىسىمشارت بويىنشا جۇمىس ىستەيتىندەر ينستيتۋتىن ەنگىزۋ، مەملەكەتتىك قىزمەتكەرلەردىڭ الەۋمەتتىك پاكەتىن قايتا قاراۋ ماسەلەسىن قاراستىرامىز. ون ءبىرىنشى جوبا - جۇيەدە مەملەكەتتىك ورگانداردىڭ قاجەتتىلىگىمەن تىعىز بايلانىستا ءبىلىم، بىلىكتىلىك جانە داعدىلارىن ۇنەمى جەتىلدىرۋ. مەملەكەتتىك ورگاننىڭ قاجەتتىلىگىنە بايلانىستى ءبىز مەملەكەتتىك قىزمەتشىلەردى مەملەكەتتىك قىزمەت اگەنتتىگىنىڭ قابىرعاسىندا وقىتاتىن بولامىز»، - دەدى انار جايىلعانوۆا.
اۆتور: زارينا قاھارمان