الاكولدەگى 14 دەمالىس ورنى جۇمىس ىستەۋگە رۇقسات الدى

سەمەي. قازاقپارات - شىعىس قازاقستان وبلىسىندا الاكولدەگى تۋريستىك نىسانداردىڭ كوروناۆيرۋس جاعدايىندا جازعى ماۋسىمعا دايىندىعى تەكسەرىلۋدە، دەپ حابارلايدى قازاقپارات ءتىلشىسى.

دەمالىس ورىندارىنىڭ باسشىلارى ش ق و اكىمى دانيال احمەتوۆتى قولداپ، مونيتورينگىلىك توپپەن بىرگە سانيتارلىق- ەپيدەميولوگيالىق تالاپتاردىڭ قاتاڭ ساقتالۋىن تەكسەرۋگە كىرىستى.

«وبلىس اكىمىمىن كەزدەسۋ ءوتتى. جيىن بارىسىندا ايماق باسشىسى بىزگە دەمالىس ورىندارىن تولتىرۋدىڭ جاڭا جولىن ايتتى. سونداي- اق مونيتورينگىلىك توپپەن بىرگە جۇمىس ىستەۋدى ۇسىندى. ەندى توپ مۇشەلەرىمەن بىرگە دەمالىس ورىندارىنىڭ قوناقتاردى قارسى الۋعا قانشالىقتى دايىن ەكەنىن قاراپ جاتىرمىز. ويتكەنى دەمالۋشىلار مەن قىزمەتكەرلەردىڭ دەنساۋلىعى ءبىز ءۇشىن ءبىرىنشى ورىندا»، - دەدى «ءىنجۋ» جانە «الاكول اراسان» دەمالىس ورىندارىنىڭ يەسى انار باتىموۆا.

رەيد قورىتىندىسى بويىنشا، 60 دەمالىس ورنى ماۋسىمعا ءىشىنارا دايىن ەكەنى انىقتالدى. قازىر وسى نىسانداردا سانيتارلىق- ەپيدەميولوگيالىق نورمالاردى ساقتاۋ جۇمىستارى جۇرگىزىلۋدە. 14 دەمالىس ورنىنا تۋريستەردى قابىلداۋعا دايىن ەكەندىگىن راستايتىن اكتى بەرىلدى. بۇل نىساندارعا كەلۋشىلەردىڭ 50 پايىزى (712 ادام) ورنالاسا الادى. 101 دەمالىس ورنى دايىندىقتى ازىرشە باستاعان جوق. سەبەبى ولاردىڭ دەنى 2-3 جاعالاۋدا ورنالاسقان. سايكەسىنشە، ولار 20 - ماۋسىمعا قاراي اشىلادى.

«بىز بارلىق سانيتارلىق- ەپيدەميولوگيالىق تالاپتاردى ورىنداپ، رەسمي تۇردە جۇمىس ىستەۋگە رۇقسات الدىق. ءاربىر شىعابەرىس ەسىكتە سانيتايزەرلەر قويىلىپ، الەۋمەتتىك قاشىقتىق ساقتالعان. قورعانىس قۇرالدارى دا بار. بىزدە 100 پايىز قاۋىپسىز دەپ ايتا الامىز. قازاقستاندىقتارعا ايتار ءوتىنىشىم، جەدەل تەستىدەن وتكەنىڭىز تۋرالى انىقتامانى ۇمىتپاي الا كەلىڭىزدەر»، - دەدى «پارۋس» دەمالىس ورنىنىڭ يەسى جاننا رامازان.

كاسىپكەرلەر الاكول جاعالاۋىنداعى قاۋىپسىزدىكتى قامتاماسىز ەتۋ ماڭىزدى ەكەنىن تۇسىنەدى. ولار وسى باعىتتاعى اتقارىلاتىن جۇمىستارعا ۇلكەن جاۋاپكەرشىلىكپەن قارايدى.

اۆتور: تالعاتجان مۇحامەتبەك ۇلى