ەلىمىزدە 14 جاسقا دەيىنگى بالالاردى تۇرعىلىقتى جەرى بويىنشا تىركەۋ الىنىپ تاستالدى
پەتروپاۆل. قازاقپارات - سولتۇستىك قازاقستان وبلىسىندا كوشى-قون قىزمەتى باسقارماسىنىڭ ماماندارى جىل باسىنان بەرى 4 مىڭنان استام ادامدى تىركەدى، دەپ حابارلايدى قازاقپارات ءتىلشىسى.
س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، وڭىردە ەكى ايدا تۇرعىلىقتى مەكەنجايى بويىنشا 4210 ادام تىركەلگەن. ونىڭ 679 ى، ونىڭ ىشىندە بالالار بار، ۋاقىتشا تىركەۋگە تۇرعان. ال 22- اقپاننان باستاپ قازاقستاننىڭ كوشى-قون زاڭناماسىنا وزگەرىستەر ەندى. بۇدان بىلاي 14 جاسقا دەيىنگى بالالاردى تۇرعىلىقتى جەرى بويىنشا تىركەۋدىڭ قاجەتى جوق.
«ەنگىزىلگەن وزگەرىستەرگە ساي ەندى 14 جاسقا تولعاننان كەيىن عانا بالا تۇرعىلىقتى مەكەنجايى بويىنشا، ۋاقىتشا تۇراتىن جەرى بويىنشا تىركەۋگە الىنادى. ق ر ازاماتتىق كودەكستىڭ 16 بابىنا سايكەس 14 جاسقا تولماعانداردىڭ نەمەسە قامقورلىقتاعى تۇلعالاردىڭ تۇراتىن جەرى بولىپ ولاردىڭ زاڭدى وكىلدەرىنىڭ مەكەنجايى ەسەپتەلەدى»، - دەدى س ق و پ د كوشى-قون قىزمەتى باسقارماسىنىڭ باستىعى تالعات ابىليەۆ.
مامانداردىڭ ايتۋىنشا، مەملەكەتتىك جانە جەرگىلىكتى اتقارۋشى ورگاندار ازاماتتىق كودەكستى نەگىزگە الا وتىرىپ، مەملەكەتتىك قىزمەت كورسەتۋ بارىسىندا بالانىڭ مەكەنجايىن كورسەتۋ ءۇشىن اقپاراتتىق جۇيەدەن اتا-اناسىنىڭ ءبىرىنىڭ تىركەلگەندىگى جونىندەگى مالىمەتتى الۋى ءتيىس.
