س ق و-دا پوليتسيا بالىقشى مەن ونىڭ 14 جاستاعى ۇلىن قۇتقاردى
پەتروپاۆل. قازاقپارات - سولتۇستىك قازاقستان وبلىسىندا ءتارتىپ ساقشىلارى بوراندا جولدا قالعان 20 ادامعا كومەك كورسەتتى، دەپ حابارلايدى قازاقپارات ءتىلشىسى.
س ق و پوليتسيا دەپارتامەنتى باسپا ءسوز قىزمەتىنىڭ حابارلاۋىنشا، ءتورت اۆتوكولىككە مىنگەن جامبىل اۋدانى بلاگوۆەشەنكا ەلدى مەكەنىنىڭ تۇرعىندارى تۇندە ايتۋار اۋىلىنىڭ ماڭىندا جولدا قالادى. ولار عابيت مۇسىرەپوۆ اۋدانىنان ۇيلەرىنە قايتىپ كەلە جاتقان. كولىكتىڭ بىرىندە كىشكەنتاي بالا بولعان. قار العان جولدان وزدىگىنەن وتە الماسىن بىلگەن تۇرعىندار ارنايى قىزمەتتەرگە قوڭىراۋ شالىپ، كومەك سۇرايدى.
ارحانگەلكا اۋىلىنىڭ ۋچاسكەلىك پوليتسيا ينسپەكتورى اتىعاي تەمەشوۆ جەدەل تۇردە قۇتقارۋ وپەراتسياسىن ۇيىمداستىردى.
«كولىكتەر باتقان جەرگە اۋىلدىق وكرۋگ اكىمى، جەدەل جاردەم كولىگىنىڭ جۇرگىزۋشىلەرى جەتتى. ايتۋار اۋىلىنا دەيىن توعىز شاقىرىم قالعان ەكەن. باتقان كولىكتەردى كۇرەكپەن قاردان ارشىپ شىعاردىق. جەدەل جاردەم ماشيناسى جول باستاپ وتىردى. وعان دەيىن جول تازالايتىن تەحنيكا جەتىپ، تۇرعىنداردى ايتۋار اۋىلىنان بلاگوۆەشەنكاعا دەيىن شىعارىپ سالدى. مۇنداي جاعدايدا حالىقتىڭ بىرلىگى بايقالادى. جۇرت قولدارىنان كەلگەنشە كومەكتەسۋگە تىرىسادى»، - دەيدى پوليتسيانىڭ ۋچاسكەلىك ينسپەكتورى اتىعاي تەمەشوۆ.
ەسىل اۋدانىندا تاسجولدا كەزەكشىلىك ەتىپ جۇرگەن پاترۋلدى پوليتسەيلەر قار قۇرساۋىندا قالعان بالىقشى مەن ونىڭ 14 جاستاعى بالاسىنا كومەكتەستى. بالىق اۋلاۋعا بارعان تۇرعىن اۋا رايىنىڭ بۇزىلعانىن بايقاماي قالعان. بوراننىڭ سالدارىنان Mitsubishi Pajero كولىگىمەن وزدىگىنەن كول باسىنان شىعا الماعان وعان ءتارتىپ ساقشىلارى مەن جەرگىلىكتى ج ش س كومەككە كەلىپ، ماشيناسىن قاردان الىپ شىقتى.
