كانادادا 14 بىردەي حوككەيشى كولىك اپاتىنان كوز جۇمدى
استانا. قازاقپارات - كانادادا «گۋمبولدت برونكوس» جاستار كومانداسى «نيپاۆين حوۋكس» كومانداسىنا قارسى ويىن كورسەتۋگە بارا جاتىپ، اۆتوبۋس ساسكاچيەۆان پروۆينتسياسىنداعى تيسدەيلدەن 30 شاقىرىم جەردە جۇك كولىگىمەن سوقتىعىسىپ قالعان.
بۇل تۋرالى ВВС باسىلىمى حابارلايدى.
جەرگىلىكتى پوليتسيا اپاتتان 14 ادامنىڭ كوز جۇمعانىن راستادى. قازا بولعانداردىڭ جاسى 16-21 اراسىندا. اۆتوبۋس جۇرگىزۋشىسى دە اپات سالدارىنان قازا بولىپتى.
سونىمەن قاتار تاعى 14 ادام اۋرۋحاناعا جەتكىزىلگەن. ولاردىڭ ۇشەۋى اۋىر حالدە جاتىر.
كانادانىڭ كورولدىك اتتى پوليتسياسىنىڭ مالىمەتىنشە، اپات كەزىندە اۆتوبۋستا 28 ادام بولعان.
كانادانىڭ پرەمەر-ءمينيسترى دجاستين تريۋدو اپاتتان قازا تاپقانداردىڭ جاقىندارى مەن تۋىستارىنا كوڭىل ايتتى.
پوليتسيا ينسپەكتورى تەد مۋنرو قۇتقارۋ وپەراتسياسى جالعاسىپ جاتقانىن مالىمدەدى. نيپاۆين قالاشىعىنداعى شىركەۋدە زارداپ شەككەندەردىڭ وتباسىنا ارنالعان ورتالىق ۇيىمداستىرىلدى.
ال حوككەيشىلەردىڭ ءبىرىنىڭ اكەسى مايلز شۋملانسكي ۇلى وزىنە حابارلاسقاننان كەيىن، وقيعا ورنىنا كەلگەن.
«بۇل سۇمدىق اپات بولدى. اۆتوبۋستى كوتەرگىش كران الىپ شىقتى»، - دەيدى ول جەرگىلىكتى Saskatoon Star Phoenix گازەتىنە بەرگەن سۇحباتىندا.
«گۋمبولدت برونكوس» حوككەي كلۋبىنىڭ پرەزيدەنتى كيەۆين گەريندجەر مالىمدەمە جاساپ، «ويى مەن دۇعالارىن» سپورتشىلاردىڭ وتباسى مەن كوماندا مۇشەلەرىنە ارنادى.
«ءبىزدىڭ «برونكوس» وتباسىمىز وزىنە كەلە الماي وتىر. بۇل جاعدايدان كەيىن وزىمىزگە كەلۋ قيىن بولىپ تۇر»، - دەلىنەدى كلۋبتىڭ رەسمي سايتىندا.
سونىمەن قاتار اپاتقا قاتىستى پىكىر بىلدىرگەن «نيپاۆين حوۋكس» كلۋبىنىڭ پرەزيدەنتى داررەن وپپ بولعان وقيعانى «سۇمدىق اپاتقا» تەڭەدى.
«اناسى، اكەسى جانە اعالارى ءوز بالالارىنىڭ، باۋىرلارىنىڭ امان قالعانى تۋرالى اقپاراتتى كۇتىپ وتىر»، - دەيدى وپپ Globe and Mail-گە بەرگەن سۇحباتىندا.
