قىزىلوردادا 14 بالانى باۋىرىنا باسقان وتباسى تۇرادى

وتباسى العاشقىدا ءشامشيا مەن ارتەم ەسىمدى ورەندەردى پاتروناتتىق تاربيەگە العان ەكەن. بۇل - 2009-جىل ەدى. سول جىلدارى ەلىمىزدە پاتروناتتىق تاربيەگە بالا الۋعا بولاتىنىن ەستىگەندە اقمارال مالاباعاروۆا ىشتەي قۋانعان ەدى. ويتكەنى، ونىڭ اناسى جەتىمدەر ۇيىندە قىزمەت ەتتى. ءوزى دە پەرزەنتحانادا جۇمىس جاسايتىن. وندا تاستاندى سابيلەردى كورگەندە قىنجىلاتىن. وسىنداي جاعدايلار اقمارالدىڭ سابيلەرگە دەگەن سەزىمىن ەسەلەي ءتۇستى. 2009-جىلى ءشامشيا مەن ارتەمدى باۋىرىنا باسسا، ودان كەيىن ەكى قىز بالانى، سودان كەيىن كورەي ۇلتىنان 3 ۇل، 1 قىزدى قامقورلىققا الدى. ءوزىنىڭ تۋعان ۇلى - قايراتتان كەيىن قايتا انا اتانۋ باقىتى وسىلايشا بۇيىرعان ەدى.

سودان بەرى ون جىلعا جۋىقتادى. بۇگىندە قايرات، ارتەم، ءشامشيا جوعارى وقۋ ورىندارىندا ءبىلىم الىپ، ماماندىعى بويىنشا قىزمەت جاسايدى. ال انار 10- سىنىپتا وقىسا، ودان كەيىنگى ناستيا، كارينا، ۆيكتوريا، ءمولدىر ەسىمدى قىزدارى دا مەكتەپ قابىرعاسىندا ءجۇر. رامازان، راسۋل، يسلام، نيكيتا شاڭىراقتى شاتتىققا بولەپ كەلەدى. ەگىز قوزى سەكىلدى ءبىر-بىرىمەن تەتەلەس نۇرتاس پەن مۇحامەد تە وتباسىنىڭ كوزقۋانىشى. ولار ونەر، سپورتقا اۋەس. ءتۇرلى بايقاۋلار مەن سايىستارعا قاتىسىپ كەلەدى.

«بالالارىما اۋەل باستان ساباق ۇلگەرىمى، ءتارتىبىنىڭ جاقسى بولۋىن ەسكەرتكەنمىن. ولاردى قازاقى بولمىستا تاربيەلەۋگە كوڭىل بولەمىن. قىزدارىمنىڭ شاش قيۋىنا قارسىمىن. ۇلتتىق ءداستۇردى زەردەلەرىنە توقىپ كەلەمىن»، - دەيدى ا. مالباعاروۆا.

وسىلايشا سان ءتۇرلى ۇلت وكىلدەرىنەن قۇرالعان بالالار ءبىر شاڭىراق استىندا ءوسىپ كەلەدى. وعان باعدات پەن اقمارالدىڭ يماندىلىعى مەن بالالارعا دەگەن سۇيىسپەنشىلىگى سەپ بولىپ وتىر.