جەمقورلىقپەن كۇرەستە مەملەكەتكە 14 ميلليارد تەڭگە قايتارىلدى - شپەكبايەۆ
«ءبىزدىڭ ءاربىرىمىز كۇن سايىنعى جۇمىستا جەمقوردىڭ وزىنە پاراقورلىقپەن كۇرەسۋگە مورالدىق قۇقىعى جوق ەكەنىن تولىعىمەن ءتۇيسىنۋىمىز كەرەك. ىشكى سىبايلاس جەمقورلىقتىڭ ءاربىر فاكتىسىن جاسىرماي ايتىپ، ول ءىس قىلمىستىق- قۇقىقتىق تۇرعىدا تەرگەلۋى كەرەك»، - دەيدى اليك شپەكبايەۆ ۆەدومستۆونىڭ كوللەگيالىق وتىرىسىندا.
ونىڭ ايتۋىنشا، ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگى وتكەن جىلى 1835 سىبايلاس جەمقورلىققا قاتىستى ءىستىڭ بەتىن اشقان. بۇل 2016 -جىلدىڭ كورسەتكىشىمەن سالىستىرعاندا، 18 پايىزعا تومەن. 108 جۇيەلى جەمقورلىقتىڭ بەتى اشىلىپ، 320 ادام قىلمىستىق جاۋاپكەرشىلىككە تارتىلعان. 5 ۇيىمداسقان قىلمىستىق توپتىڭ ارەكەتىنە توسقاۋىل قويىلعان. قولعا الىنعان شارالاردىڭ ارقاسىندا مەملەكەت قازىناسىنا 14 ميلليارد تەڭگە قايتارىلعان.
اگەنتتىك ءتوراعاسىنىڭ ايتۋىنشا، سىبايلاس جەمقورلىققا قارسى ساياساتتىڭ باستى شارتتارىنىڭ ءبىرى - مەملەكەتتىك اپپاراتتىڭ تولىقتاي تازالىعى بولىپ تابىلادى. اليك شپەكبايەۆتىڭ سوزىنە سۇيەنسەك، سىبايلاس جەمقورلىققا قارسى كۇرەستىڭ ناتيجەسى ارقىلى ەلىمىزدەگى ينۆەستيتسيالىق كليماتتىڭ جايلىلىعىن ساقتاۋعا بولادى.
قازىرگى ۋاقىتتا اگەنتتىكتىڭ اۋماقتىق بولىمشەلەرىنە شەتەلدىك كومپانيالاردىڭ جۇمىسىنا تەكسەرۋشى ورگانداردىڭ زاڭسىز ارالاسۋىنىڭ الدىن الۋ ساتىسىن جۇرگىزۋ تاپسىرىلىپ وتىر.
