كۇيەۋى قىز بالا تۋعانى ءۇشىن تاستاعان ايەل ەكىنشى وتباسىندا 14 بالا تاربيەلەدى
بۇل تۋرالى «پەندەمىز عوي» باعدارلاماسىندا ايتىلدى.
ستاتيستيكالىق دەرەكتەر بويىنشا، «ۇل» ءتۇبىرلى ەسىمدەر قويۋ سوڭعى 5 جىلدا سيرەگەن. ۇلجان ەسىمى قازاقستان بويىنشا 13805 قىزعا، ۇلبوسىن 13351، ۇلدانا 6396 قىزعا قويىلعان. اراسىندا بولعان، تويعان سىندى ەسىمدەر دە كەزدەسەدى. قازاقتا قالىپتاسقان ىرىم بويىنشا، مۇنداي ەسىم قويىلعان قىزدان كەيىن دۇنيەگە ۇل بالا كەلەدى ەكەن. اتالعان باعدارلامانىڭ كەيىپكەرى كۇيەۋىنىڭ قىز بالا تۋعانى ءۇشىن تاستاپ كەتكەنىن ايتىپ جاتىر. دەسە دە، تامارا راقىمجانوۆا ەكىنشى رەت تۇرمىسقا شىعىپ، بۇگىندە 14 بالا تاربيەلەپ وتىر.
«ءوزىم جۇمىستامىن. اللاعا شۇكىر، قازىر 14 بالا تاربيەلەپ وتىرمىن. مۇنى پەشەنەمە جازىلعان تاعدىر دەپ بىلەمىن. ءبىرىنشى جولداسىمنان تۇڭعىشىم قىز بالا بولدى. مەنىڭ قىز بالا تۋعانىما كوڭىلى تولماي، ءۇش بالاسى بار ايەلدىڭ قول استىنا كىرىپ الدى. ول كەزدە مەن جاس ەدىم. ومىرگە وكپەلەپ ءجۇردىم. 18 جاسىمدا مەكتەپتى بىتىرە سالىسىمەن وسىنداي وقيعالاردى باسىمنان كەشىردىم. ءبىزدىڭ زامانىمىزدا ۋزي دەگەن بولمادى. سول سەبەپتى ءسابيىمنىڭ جىنىسىن الدىن الا بىلگەن جوقپىن. ول كىسى ءسابيىمىز التى ايلىق بولعان كەزدە مەنى تاستاپ كەتتى. ەنەم دە جاقتىرماي، ءوزىمنىڭ ارى قاراي بىرگە بولا المايتىنىمىزدى ءتۇسىندىم.
اجىراسۋعا رۇقساتىمدى بەرىپ، تۇمىسقا شىقپاي 7 جىل ءجۇردىم. اللاعا مىڭ دا ءبىر شۇكىرشىلىك ەتەمىن. باستاپقىدا تۇرمىسقا شىقپاي، جالعىز وتەمىن دەپ ويلاۋشى ەدىم. قىز بالا ۇل بالادان كەم ەمەس. ءبارىمىز دە انامىز. قازىرگى جولداسىمنىڭ ءبىرىنشى جۇبايى قايتىس بولىپ، 7 بالاسىمەن قالعان بولاتىن. مەنى اعايىن تۋىسقاندارى كوندىردى. باسىما ورامال سالىپ، جۇرەگىمنىڭ قالاۋى تۋرالى سۇرادى. مەن كەتەتىنىمدى ايتتىم. سوندا 1-سىنىپتا وقيتىن ماقسات ەسىمدى ۇلى «مەن انامدى قاتتى ساعىندىم. ماعان انا كەرەك. ماعان انا بولىڭىزشى» دەپ جىلادى. وسى ۇلدىڭ كوز جاسىمەن سول وتاندا قالدىم. ەكىنشى جولداسىم ماعان ەشقانداي تالاپ قويعان ەمەس. سەبەبى، بارا سالىسىمەن ۇل بوساندىم»، - دەيدى ول.
ەستەرىڭىزدە بولسا، 2016 -جىلى شىمكەنتتە ءدال وسىنداي وقيعا ورىن العان. كۇيەۋى 6 رەت قىز تۋعان ايەلىن ۇرىپ- سوعىپ ءبىراز زورلىق كورسەتكەن. ءتىپتى، وسىدان كەيىن ول وتباسىن تاستاپ كەتكەن بولاتىن. كوپشىلىك بۇل سيتۋاتسيادا الەۋمەتتىك- تۇرمىستىق جاعدايدىڭ سەبەپ بولعانىن ايتىپ جاتىر. ال تامارا حانىمنىڭ ءبىرىنشى كۇيەۋىمەن اجىراسۋىنا ەنەسى سەبەپشى بولعان ەكەن.
«ءبىرىنشى جولداسىم ءۇيدىڭ جالعىز ۇلى ەمەس. وزدەرى ءۇش اعايىندى ازامات بولاتىن. ەنەم ەكەۋىمىزدىڭ ورتامىزعا كوپ ءتۇستى. جولداسىم ۇيگە كەش كەلەتىن. كەيدە مۇلدەم كەلگىسى كەلمەي قالاتىن. تۇڭعىشىمنىڭ ەسىمى - دينارا. ءوزىمنىڭ اپكەم وسىلاي قويعان بولاتىن. پەرزەنتحاناعا تەك وزىممەن ءبىر تۋعاندار كەلىپ تۇردى»، - دەيدى ول.
