قىزىلوردالىق 14 جاستاعى شاباندوز تاپسىرىسپەن اقشاعا اتپەن شابادى
بايگەگە سايگۇلىك قوسار الدىندا اتبەگىلەردىڭ وزدەرى ىزدەپ كەلىپ، وعان «مەنىڭ اتىممەن شاپ» دەپ تالاسادى.
سەبەبى، شەبەر شاباندوز قاي اتقا مىنسە دە، جۇلدەسىز قايتپايدى. سايلاۋبەك ءبىر ماۋسىمدا جيىرمادان استام جۇلدە الادى، دەپ حابارلايدى Baq.kz.
اتبەگىلەردىڭ ايتۋىنشا، اتتىڭ بايگەدە ءبىرىنشى بولىپ كەلۋى 50 پايىز شاباندوزعا تىكەلەي بايلانىستى. سوندىقتان، جىلقى جاراتاتىن جاندار سايگۇلىكپەن «سويلەسە» الاتىن شاباندوز سايلاۋبەك باتىربايدى ىزدەيدى.
«بايگە ماۋسىمىندا ءوتىنىش ايتۋشىلار كوبەيەدى. تۇلپار جۇيرىك بولعانىمەن، ونىڭ وزىپ شىعاتىنىنا ەشكىم كەپىلدىك بەرە المايدى. سودان عوي، اتتىڭ قىر-سىرىن تانيدى دەپ بايگەگە ات قوساتىن قازاقتاردىڭ ماعان كەلەتىنى. مىسالى، ءبىر تويدا ات جارىس بولسا، سونداعى تاي جارىسقا دا، توق بايگەگە دە، قۇنان جارىسقا دا، الامان بايگەگە قاتىسىپ شىعامىن. ءبىر اتتان ءتۇسىپ، ەكىنشىسىنە ءمىنىپ، شابا بەرەمىن»، - دەيدى شاباندوز.
سايلاۋبەكتى اكەسى ەكى جاسىنان اتقا وتىرعىزىپ، تاقىمى تاستاي، بىلەگى قۇرىشتاي، جىگەرى قىلىش شاباندوز ەتىپ تاربيەلەپتى.
«ءوزىم كوكپار اتتارىن باپتايمىن. بالام سايلاۋبەك كوكپارعا دا، ات بايگەسىنە دە شابادى. بايگەگە شابۋعا ءوتىنىش ايتقاندار بولسا، مەنەن رۇقسات سۇرايدى. كىشكەنتايىنان تايدىڭ تۇياعىنان تاياق جەپ وسكەن بالا عوي، ونىسىنا قارسى بولمايمىن. قيمىلى شاپشاڭ، ات ەرتتەۋدى دە وتە جاقسى بىلەدى. اسىرەسە، الامان بايگەلەرگە ەرەكشە دايىندالادى»، - دەيدى عالىمبەك قوجاليەۆ.
سۋىرتپاقتاپ «ستاۆكاسى» جايلى سۇراپ كورىپ ەدىك، سايلاۋبەك اتپەن ءبىر شاۋىپ كەلگەنى ءۇشىن 10 مىڭ تەڭگە الاتىنىن ايتتى. ەگەر توپ جارسا، جۇلدەنىڭ 10 پايىزىن دا الادى ەكەن.
قازىرگى كۇنى سايلاۋبەك مامىر ايىنداعى مەرەكەلەردە وتەتىن ات جارىستارعا قىزۋ دايىندىق جاساۋدا.
