تالما دەرتىمەن 14 جىل بويى اۋىرعان قىز اۋرۋدان قالاي ايىققانىن ايتتى
بۇل تۋرالى زامانا گازەتى حابارلايدى.
وسى اڭگىمەنى ەستىگەندە بۇل جاي ءبىزدى قاتتى قىزىقتىردى، سەبەبى ەل اراسىندا «قويانشىق» دەپ اتالاتىن مۇنداي اۋرۋدى ەمى جوق دەپ ايتاتىنى بەلگىلى، سوندىقتان ودان ارىلعان اداممەن سويلەسكىمىز كەلدى. تۇرسىناي ورداباسى اۋدانىنداعى تورتكۇل اۋىلىندا تۇرادى ەكەن.
«وسىنداي دەرتپەن اۋىراتىن ادامدارعا كومەك رەتىندە جول سىلتەۋ ءوزىمنىڭ دە ويىمدا بار ەدى. حابارلاسقانىڭىز جاقسى بولدى»، - دەدى تۇرسىناي بىزگە.
ونىڭ جاسى قازىر 33 تە ەكەن. كوپبالالى وتباسىندا ومىرگە كەلىپتى، اعاسى، ەكى ءىنىسى جانە ءبىر ءسىڭلىسى بار ەكەن. اناسى زەينەتكەر، اكەسى كولىك جۇرگىزۋشىسى بولىپ جۇمىس ىستەيدى. ءوزى 2000-جىلى شىمكەنتتەگى دارىندى بالالارعا ارنالعان №69 ەكونوميكا جانە قۇقىق ليتسەيىن بىتىرگەن ەكەن. سودان اۋىلىنا بارعاندا دەرتىنىڭ العاشقى بەلگىلەرى سەزىلە باستاپتى. العاشىندا اۋرۋ ۇستاماسىمەن قۇلاپ جۇرگەنىندە وعان ەشكىم سەنبەپتى. ۋاقىت وتە كەلە اۋرۋى اسقىنىپ، ۇدەي تۇسكەن. سوسىن دارىگەرلەر مەن ەمشىلەردى جاعالاۋمەن بولىپتى، ءبىراق دەرتىنە ەشكىمنىڭ دە شيپاسى تيمەپتى. ءبىر دارىگەرلەر اۋرۋدىڭ سەبەبىن ەت پەن تەرىنىڭ اراسى قاتتى سۋىقتاپ، سترەسس العاننان دەپ ءتۇسىندىرىپتى.
«العاشىندا كوزىم تارتىپ، ءبىر ورىندا سىرەسىپ، قاتىپ قالاتىنمىن. اۋرۋ كۇندىز-ءتۇن دەمەي، تاۋلىگىنە 5 رەتتەن، كەيدە 21-22 رەت ۇستايتىن. ءار قۇلاعان سايىن ءۇش- ءتورت مينۋتقا ەسىمدى جوعالتامىن. بەتىم بەرى قاراي باستاعاندا، 2006-جىلى اۋىلدا مەكتەپتىڭ جانىنان بۋفەت (اسحانا) اشقانمىن. ۇلكەن، 10-15 ليترلىك ىدىسقا سۋ قايناتىپ، وقۋشىلارعا كوفە، شاي دايىنداپ بەرەتىن ەدىم. بىردە كەنەتتەن تالمام ۇستاپ، قايناپ تۇرعان سۋعا جامباسىممەن قۇلاپ كۇيىپ قالدىم. جامباستىڭ جاراقاتتان جازىلۋى قيىنداۋ بولادى ەكەن. اۋرۋحانادا ءبىر اي جاتىپ شىقتىم. بۇل از بولعانداي، كەيىن اياعىمدى ەكى رەت كۇيدىرىپ الدىم. قىسقاسى، وقۋعا تۇسەتىن جاسىمدا امالسىز ۇيدە وتىردىم. كۇندە ازاندا كوزىمدى اشقاندا، اللاعا شۇكىر، ءتىرى قالدىم، ەندى كەشكە دەيىن ءبىر ءمانىسى بولار دەپ ءوزىمدى جۇباتاتىنمىن. مەنىڭ جايىمدى ۋايىمداعان انام جانىمنان كەتپەيتىن.
2014 -جىلى استانانىڭ بارلىق اۋرۋحانالارىن ارالاپ ءجۇرىپ، بيبىگۇل التايەۆا ەسىمدى نەۆروپاتولوگ- ەپيلەپتولوگ دارىگەردى ىزدەپ تاپتىق. سودان ول كىسىگە بارىپ قارالدىق، جازىپ بەرگەن دارىلەرىن ۋاقتىلى ىشكەننىڭ ارقاسىندا ءبىر ايدا-اق جاعدايىم جاقسارا باستادى. ەمى ماعان وڭدى اسەر ەتتى. قازىر ەكىنشى جىل، ەپيلەپسيا مەنى مازالامايتىن بولدى. التى اي سايىن استاناعا بارىپ، تەكسەرۋدەن ءوتىپ تۇرامىن. وتكەن دۇيسەنبىدە عانا بارىپ كەلدىم. اۋىرىپ جۇرگەنىمدە مەنىمەن ەشكىمنىڭ سويلەسكىسى كەلمەيتىن ەدى، بۇل جاعدايدىڭ ماعان قاتتى اسەر ەتىپ جاتقانىن بايقاعان انام اۋىلداعى اۋرۋحانادا ىستەيتىن باعلان ەسىمدى پسيحولوگ مامانعا كورسەتتى. ول كىسى جاقسى كەڭەستەر بەرىپ، مەنىڭ بويىما سەنىم ۇيالاتتى»، - دەيدى تۇرسىناي شابدانوۆا.
ول قازىرگى تاڭدا اۋىل ورتالىعىنداعى كىشىگىرىم تىگىن شەبەرحاناسىندا تىگىنشى بولىپ جۇمىس ىستەيدى، قولىنان شىققان قۇراق كورپەشەلەر، قازاقشا بۇيىمدار، كورپە-توسەكتەر، توقىما بۇيىمدارى اۋىل تۇرعىندارىنىڭ سۇرانىسىنا يە ەكەن.
«بۇگىنگى كۇنگە جەتىپ وتىرعانىم ءۇشىن الدىمەن اللاعا شۇكىر دەيمىن، اتا-انام مەن باۋىرلارىما راحمەتىمدى ايتقىم كەلەدى. ال ەپيلەپسيامەن اۋىراتىندارعا ايتارىم، مۇنداي اۋرۋدى جەڭىپ شىعۋ ءۇشىن الدىمەن شىدامدىلىق، سابىرلىلىق، ءتوزىم كەرەك ەكەن. اۋىرعان جاعدايدا مىندەتتى تۇردە دارىگەرگە قارالىپ، ءدارىنى ۋاقتىلى ءىشۋ قاجەت. پسيحولوگتاردىڭ كەڭەسىن الۋ دا ماڭىزدى. ال تۋىستارى، جالپى، ارالاساتىن ادامدار ناۋقاستارمەن كوپ سويلەسىپ، ولارعا ادام رەتىندە قاراعانى دۇرىس»، - دەيدى تۇرسىناي شابدانوۆا.
...وسى ورايدا كەيبىر دەرەكتەر جونىندە دە ايتا كەتۋدى ۇيعاردىق. ستاتيستيكادان بىلگەنىمىز، ەلىمىزدە ەپيلەپسيامەن 3000 نان اسا ادام اۋىرادى ەكەن. بۇل دەرتتىڭ سەبەبى ءالى تولىق انىقتالماعان. كوبىنە بالا قۇرساقتا جاتقاندا زاقىم العاندا نەمەسە ميدىڭ ءارتۇرلى اۋرۋلارى اسەرىنەن پايدا بولۋى مۇمكىن. كەيدە بۇل اۋرۋ تۇقىم قۋالاۋى دا ىقتيمال. جالپى، ونىڭ 250 دەن اسا ءتۇرى بار، ونىڭ 20 پايىزى ەمدەلمەيدى ەكەن. ال قالعاندارىنا مەديتسينانىڭ كۇشى جەتەدى دەگەن ءسوز. قاجەت ەتكەندەردىڭ بۇل جونىندە دە بىلە جۇرگەنى دۇرىس شىعار.
