شىمكەنتتە «نۇرلى جول» باعدارلاماسىمەن 14 مەكتەپ سالىنۋدا

استانا. قازاقپارات - وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ شىمكەنت قالاسىندا سالىنىپ جاتقان مەكتەپتەردىڭ قۇرىلىس جۇمىستارىمەن تانىستى، دەپ حابارلايدى وبلىس اكىمدىگىنىڭ باسپا ءسوز قىزمەتى.

حالىق سانى كۇن ساناپ وسكەن وڭىردە مەكتەپ پەن بالاباقشاعا دەگەن سۇرانىس ارتىپ وتىر. شىمكەنتتە جىلىنا شامامەن 4500 بالا دۇنيەگە كەلەتىندىگىن، سايكەسىنشە جىلدان-جىلعا قالا ورتالىقتارىنداعى مەكتەپتەردىڭ تارلىق ەتىپ وتىرعانىن جەتكىزگەن قالا اكىمى عابيدوللا ءابدىراحىموۆ بيىلدىڭ وزىندە «نۇرلى جول» باعدارلاماسى اياسىندا 5 مەكتەپ سالىنىپ جاتقانىن ايتتى. سونداي- اق ول، «شىمكەنتتە ساماننان سالىنعان 12 مەكتەپ بار» دەدى.

«اقجايىق» شاعىناۋدانىنداعى №59 -مەكتەپتىڭ جاڭادان سالىنىپ جاتقان عيماراتىندا بولعان وبلىس اكىمى 600 ورىنعا لايىقتالعان جاڭا ءبىلىم ۇياسىنىڭ قۇرىلىسىنا زاماناۋي ماتەريالداردى پايدالانىپ، مەكتەپتىڭ ەدەنى شىدامدى توسەنىشپەن جابىلۋىنا، تەرەزەسى كەڭ بولۋىنا ءمان بەرۋ كەرەكتىگىن جۇكتەدى. سونىمەن بىرگە، مەردىگەر كومپانيا «شاحار قۇرىلىس International»  ج ش س- نىڭ باسشىسىنا قۇرىلىستى جوسپارداعى كەستەدەن كەشىكتىرمەي، دەر كەزىندە تاپسىرۋ قاجەتتىگىن ەسكەرتتى.

بۇدان كەيىن وبلىس باسشىسى «قايناربۇلاق» تۇرعىن الابىندا سالىنىپ جاتقان 1200 ورىنعا لايىقتالعان جاڭا مەكتەپتىڭ دە قۇرىلىسىنا ءجىتى ءمان بەرىلىپ وتىرعانىن اتاپ ءوتتى. قۇرىلىس باسىندا جۋرناليستەرگە بەرگەن سۇحباتىندا جانسەيىت قانسەيىت ۇلى بيىل وبلىس بويىنشا 63 مەكتەپتىڭ قۇرىلىسى جۇرگىزىلىپ، ونىڭ 14 ى «نۇرلى جول» باعدارلاماسى اياسىندا سالىنىپ جاتقانىن جەتكىزدى.

«جالپى ءبىلىم سالاسىنا قاتىستى بيىل قۇرىلىسى جۇرگىزىلىپ جاتقان 67 نىساننىڭ 63 ى مەكتەپ. ونىڭ 37 سىنىڭ قۇرىلىسى اياقتالدى. ەندى قاراشا ايىندا 2 مەكتەپ تولىق پايدالانۋعا بەرىلەدى. ال قالعاندارىنىڭ قۇرىلىسى كەلەسى جىلى اياقتالادى دەپ كۇتىلۋدە»، - دەيدى وبلىستىق قۇرىلىس باسقارماسىنىڭ باسشىسى سالىحان پولاتوۆ.

ايتا كەتەيىك، مەكتەپتەر اسىرەسە، حالقى تىعىز قونىستانعان شىمكەنت قالاسى مەن سايرام، ماقتاارال، سارى اعاش جانە قازىعۇرت اۋداندارىندا سالىنۋدا.