كونترابانداشىلار انتونيس ۆان دەيكتىڭ قۇنى 14 ميلليون دوللارلىق كارتيناسىمەن ۇستالدى

بولجام بويىنشا، كونترابانداشىلار - گرۋزين بيزنەسمەندەرى - تۇركيادا ساتۋ ءۇشىن گرۋزيادان اتاقتى فلاماند سۋرەتشسىنىڭ كارتيناسىن قۇپيا تۇردە الىپ شىققان. تەرگەۋ نۇسقاسى بويىنشا، كارتينا گرۋزياعا رەسەيدەن اكەلىنگەن، ال رەسەيدەن - ەۋروپاعا.

كارتينانى قاراعان تۇركيالىق ونەرتانۋشىلار ونىڭ ءتۇپنۇسقا ەكەندىگىن مالىمدەپ وتىر. دەگەنمەن تۇپكىلىكتى قورىتىندى جاساۋ ءۇشىن ونى ساراپشىلارعا تاپسىرماق.

ايتا كەتكەن ءجون، انتونيس ۆان دەيك - 17- عاسىرداعى بەلگىلى سۋرەتشى. ونىڭ كارتينالارى الەمدەگى ءىرى مۋزەيلەرگە قويىلعان.

گەنۋيادا باروككو رۋحىندا سالعان پورترەتتەرى دەيك شىعارمالارىنىڭ شىرقاۋ بيىگى سانالادى («كاردينال گ. بەنتيۆالو پورترەتى»، 1623- ج. ش. فلورەنتسيا). ول مۇندا رۋبەنس مەكتەبى مەن ۆەنەتسيا كوركەمونەرىنىڭ وزىق ءداستۇرىن شەبەرلىكپەن ۇشتاستىرىپ، جاڭا ءتاسىل تۋدىردى. «مادوننا دەل روزاريو» (1624 پالەرمو)، «ەگيپەتكە بارار جولداعى دەمالىس» (1620 ميۋنحەن)، ت. ب. سۋرەتتەرى - وسىنىڭ ايعاعى.

ۆان دەيك - ءدىني تاقىرىپتاعى «اۋليە پەتردى ازاپتاۋ» (1615 - 17- ج. ش.  بريۋسسەل)، «يۋپيتەر مەن انتيوپا» (1617 - 18- ج. ش. بەرلين) اتتى شىعارمالاردىڭ اۆتورى. سۋرەتشى 1627- ج. انتۆەرپەنگە قايتا ورالىپ، ايگىلى «يكونوگرافياسىن» جاريالادى. 17-18- عاسىرلارداعى ەۋروپا كوركەمونەرىنە وراسان زور ىقپال ەتكەن رۋبەنس ءداستۇرىن جاڭارتىپ، ونى ىلگەرى دامىتتى.

دارىندى سۋرەتشى نەبارى 42 جىل عانا ءومىر ءسۇردى.