كاسپيدىڭ باسقا تەڭىزدەرمەن 14 - عاسىردا بايلانىسى بولعانىن دالەلدەيتىن جادىگەرلەر تابىلدى
كەتىك قالا شاھارىنىڭ ورنىن قازۋ كەزىندە ارحەولوگتار قىزىل مارجان بۇتاقتارىنىڭ بولىكتەرىن تاپتى. بۇل 14 -عاسىردا تەڭىزدەردىڭ ءبىر- بىرىمەن بايلانىسى بولعانىن راستايتىن دەرەكتەردىڭ ءبىرى بولىپ تابىلادى.
«باۋتينو كەنتىنىڭ تۇرعىندارىنىڭ تاريحي دەرەكتەرىنە سۇيەنسەك، XX عاسىردىڭ باسىندا شىركەۋلەردە يكوندا مارجان بۇتاقتارى تۇرعانى بەلگىلى. ولار مارجان بۇتاقتارى تەڭىزگە لاقتىرىلعان قۇلالى ارالىنان تابىلعان. سول كەزدەگى تۇرعىندار تەڭىز ءتۇبى مارجانعا تولى دەپ ساناعان. بۇگىندە كاسپيدە مارجان بولماعانىن بىلەمىز، ول ارالعا سۋعا باتىپ كەتكەن كەمە ارقىلى كەلۋى مۇمكىن»، - دەدى ارحەولوگ اندرەي استافيەۆ.
ەكسپەديتسيا مۇشەلەرى كەراميكالىق ىدىستىڭ سىنىعىن تاپتى. بۇل كەتىك قالادا قىش شەبەرحاناسىنىڭ بولعانىن دالەلدەيدى. ديىرمەن تاسىنىڭ ءۇش سىنىعى دا تابىلدى، بۇل وسى جەردە ەگىنشىلىكپەن اينالىسقانىن راستايدى. سونىمەن قاتار قىتايلىق فارفوردىڭ، ايەل جۇزىگىنىڭ سىنىعى، اقىقتان مونشاق سىنىقتارى تابىلدى، دەپ جازادى lada.kz.
سونىمەن قاتار ارحەولوگتار جەتى مونەتا تاپقان. ونىڭ ەكەۋىندە حيجرا جىل ساناۋى بويىنشا 761-768 -جىلدار دەپ جازىلعان.
بارلىق جادىگەرلەر وبلىستىق تاريحي- ولكەتانۋ مۇراجايىندا ساقتالاتىن بولادى.
