بەيجىڭ مەتروسىندا 14 جىلدان كەيىن جول اقىسى قىمباتتادى
ەندى جولاقى جولاۋشىلار باراتىن جەردىڭ الىس-جاقىندىعىنا قاراي ەسەپتەلەدى.
بۇرىن الەمدەگى ەڭ ارزان جەراستى جولىمەن بار جوعى 2 يۋان، ياعني 60 تەڭگەگە بۇكىل قالانى ارالاپ شىعۋعا بولاتىن.
قىتايدا جەردىڭ ءۇستى عانا ەمەس، استى دا حالىققا لىق تولى. كۇنىنە 10 ميلليوننان استام ادام تۇسەتىن بەيجىڭ مەتروسى ارزان ءارى ءتيىمدى. بار جوعى 2 يۋانعا، ياعني 60 تەڭگەگە بۇكىل قالانى ارالاپ شىعۋعا بولاتىن. ەندى جاعداي باسقاشا.
الەمدە جولاۋشىسى ەڭ تىعىز بەيجىڭ مەتروسىنداعى بيلەت باعاسى سوڭعى 14 جىلدان بەرى قىمباتتاماعان. ال جەراستى جولى وسى ۋاقىت ارالىعىندا 5 ەسەگە كەڭەيگەن. ارزان باعانى ۇستاپ تۇرۋ ءۇشىن ۇكىمەتتەن قوسىمشا سۋبسيديا دا بەرىلەتىن.
بۇدان بىلاي ەڭ ارزان باعا - 90 تەڭگە. ون ەكى شاقىرىمنان ءارى قاراي جولدىڭ قاشىقتىعىنا بايلانىستى اقشا الىنادى. وسىلايشا بيلىك قالاداعى جولاۋشىلار تاسىمالىنىڭ نەگىزى تامىرى سانالاتىن مەترودان پايدا تاۋىپ قانا قويمايمىز، قوسىمشا جول تارماقتارىن سالۋعا دا قارجى الماق. جاڭ شيڭ، بەيجىڭ قالاسى مۋنيتسيپيالدى دامىتۋ كوميتەتى قارجى ءبولىمىنىڭ باسشىسى:
- جاڭا شارا ناتيجەسىن بەرە باستاعان سوڭ، مەترو جولدارىن جاقسارتۋ جۇمىستارىن جالعاستىرا بەرەمىز. حالىقتىڭ باسىم بولىگى ءجۇرىپ تۇرۋ ءۇشىن جەراستى جولى وتە قولايلى. سوندىقتان قوسىمشا تاعى دا جولدار سالىناتىن بولادى.
بيلىك بۇعان دەيىن قىتاي استاناسىنداعى جول كەپتەلىسىن ازايتۋ ءۇشىن دە باعانى تىم ارزان ۇستاعان بولاتىن. ءبىراق كەرىسىنشە بولعان سياقتى. ويتكەنى قىتاي بۇرىنعىداي ۆەلوسيپەدشىلەر ەلى دەگەن اتاۋىنان الىستاپ بارادى. وسىدان 10 -جىل بۇرىن بەيجىڭ تۇرعىندارىنىڭ 32%- ى ۆەلوسيپەدپەن جۇرسە، بۇگىندە بۇل كورسەتكىش %12- عا ارەڭ جەتەدى.
جاڭ شيڭ، بەيجىڭ قالاسى مۋنيتسيپيالدى دامىتۋ كوميتەتى قارجى ءبولىمىنىڭ باسشىسى:
- ۆەلوسيپەدپەن جەتۋگە بولاتىن جەرگە مەتروعا ءمىنىپ باراتىندار كوبەيگەن. ءتىپتى 2007 -جىلدان بەرى جەر ۇستىندەگى قوعامدىق كولىكتەردەگى جولاۋشىلار سانى تىم ازايىپ كەتتى. سوندىقتان باعانى رەتتەۋ ارقىلى جەردىڭ ءۇستى مەن استىنداعى جولاۋشىلار سانىن تەڭەستىرۋ كەرەك.
بۇگىندە ۇنەمى جول جۇرەتىندەر ءۇشىن جەڭىلدىك قاراستىرىلعان. ەگەر ايىنا 100 يۋان، ياعني 3000 تەڭگە جۇمساساڭىز، %20 جەڭىلدىك جاسالادى. ءجۇرىپ- تۇرۋعا اي سايىن 150 يۋان شىقسا، %50 جەڭىلدىك بار. سوندىقتان بەيجىڭدىكتەر بيلەت باعاسىنىڭ قىمباتتاۋىنا قارسى بولا قويعان جوق. تۇسىنىستىكپەن قارادى، ءتىپتى ۇنەمى لىق تولى مەترودا جولاۋشى سانى سيرەپ قالار دەپ ۇمىتتەنۋدە.
جوۋ لين، بەيجىڭ قالاسىنىڭ تۇرعىنى: - بۇگىندە ازىق-تۇلىك باعاسى قىمباتتاپ جاتقاندا مەترودا 2 يۋانمەن ءجۇرۋ دەگەنىمىز تىم ارزان ەدى. ارينە، حالىق باعانىڭ وسۋىنە قۋانا قويمايدى. ءبىراق ىعى-جىعى بولىپ جاتاتىن حالىق سانى ازاياتىن شىعار.
تاياۋدا قىتاي استاناسىندا تاعى بىرنەشە مەترو پايدالانۋعا بەرىلىپ، بۇگىندە بەيجىڭدەگى جەراستى جولىنىڭ جالپى ۇزىندىعى 527 شاقىرىمعا جەتتى.
24.kz
