سەنات سايلاۋىنان 14 كانديدات شىعىپ قالدى
وسىلايشا، قازىرگى ۋاقىتتا 1 - قازاندا وتەتىن سايلاۋعا بارلىعى 39 كانديدات تىركەلىپ تۇر. بۇل تۋرالى ق ر ورتالىق سايلاۋ كوميسسياسىنىڭ حاتشىسى باقىت مەلدەشوۆ ءمالىم ەتتى.
«داۋىس بەرۋ كۇنىنە دەيىنگى ەكى كۇندە كانديداتتى تىركەۋ تۋرالى شەشىمنىڭ كۇشىن جويۋعا نەمەسە بۇعان دەيىن تىركەۋدەن شىعارىلعان كانديداتتى قايتا تىركەۋگە رۇقسات ەتىلمەيدى. وسىنى ەسكەرسەك، قالعان كانديداتتاردىڭ بارلىعى الداعى سايلاۋعا قاتىساتىن بولادى»، - دەيدى باقىت مەلدەشوۆ.
ونىڭ سوزىنە قاراعاندا، قازىرگى ۋاقىتتا بارلىق قاجەتتى قورعاۋ دارەجەلەرى بار جاسىرىن داۋىس بەرۋگە ارنالعان بيۋللەتەندەر ازىرلەنگەن. سايلاۋ زاڭناماسىنا سايكەس بيۋللەتەندەر سايلاۋ كۇنىنە ءبىر كۇن قالعاندا ءتيىستى اۋماقتىق سايلاۋ كوميسسيالارىنا جەتكىزىلەدى.
ەسكە سالا كەتەيىك، پارلامەنت سەناتى دەپۋتاتتارىنىڭ سايلاۋىندا داۋىس بەرۋ 2014 - جىلعى 1 - قازاندا تاڭداۋشىلاردىڭ (ماسليحاتتاردىڭ - رەد. ) وتىرىسىندا وتەدى.
تاڭداۋشىلاردىڭ بىرلەسكەن وتىرىسىنا وبلىستىڭ بارلىق ءماسليحاتتارىنان وكىل بولاتىن، سايلانعان دەپۋتاتتار سانىنىڭ ەلۋ پايىزىنان استامى قاتىسسا، ول زاڭدى دەپ سانالادى.
داۋىس بەرۋ زاڭدى بولۋى ءۇشىن تاڭداۋشىلاردىڭ بىرلەسكەن وتىرىستارىنا تاڭداۋشىلاردىڭ ەلۋ پايىزىنان استامى داۋىس بەرۋگە قاتىسۋلارى ءتيىس. داۋىس بەرۋگە قاتىسقان تاڭداۋشىلاردىڭ ەلۋ پايىزىنان استامىنىڭ داۋىسىن العان كانديدات سايلانعان بولىپ سانالادى. ال ەگەر داۋىس بەرۋدىڭ ءبىرىنشى تۋرىنا ەكىدەن استام كانديدات قاتىسسا جانە ولاردىڭ بىردە-ءبىرى جەڭىسكە قاجەتتى داۋىستار جيناي الماسا، سول كۇنى باسقا كانديداتتارمەن سالىستىرعاندا ەڭ كوپ داۋىس جيناعان ەكى كانديداتتىڭ اراسىندا ەكىنشى تۋر وتەدى.
ەكىنشى تۋردا باسقا كانديداتقا قاراعاندا داۋىس بەرۋگە قاتىسقان تاڭداۋشىلاردىڭ داۋىس كوپشىلىگىن العان كانديدات جەڭىسكە جەتتى دەپ ەسەپتەلەدى.
اۆتور: قانات مامەتقازى ۇلى
