وڭتۇستىك قازاقستاندا «ديپلوممەن اۋىلعا» جوباسى اياسىندا 1478 مامان باسپانالى بولدى
بۇل تۋرالى و ق و ايماقتىق كوممۋنيكاتسيالار قىزمەتىندە وتكەن بريفينگتە وبلىستىق ەكونوميكا جانە بيۋدجەتتىك جوسپارلاۋ باسقارماسى باسشىسىنىڭ مىندەتىن اتقارۋشى جامبولات ولجاتاي حابارلادى.
باسپا ءسوز ءماسليحاتىندا «100 ناقتى» قادام ۇلت جوسپارىنىڭ ورىندالۋىن مالىمدەگەن بايانداماشى ەلباسىنىڭ جىل سايىنعى جولداۋىندا ەلىمىزدىڭ جاس ازاماتتارىنا ۇلكەن نازار اۋدارىلىپ كەلەتىنىن ايتتى.
«ەلىمىزدە ىسكە اسىرىلىپ كەلەتىن «ديپلوممەن اۋىلعا» باعدارلاماسى اياسىندا ياعني، 2009-2015-جىلدار ىشىندە 4226 مامان 496,2 ميلليون تەڭگە سوماسىندا كوتەرمە جاردەماقىمەن قامتىلعان. وسى جىلدار ىشىندە باعدارلاما شەڭبەرىندە 3,2 ميلليارد تەڭگە بيۋدجەتتىك كرەديت باعىتتالىپ، ناتيجەسىندە 1338 مامان باسپانالى بولدى. ال جىل باسىنان بەرى 445,4 ميلليون تەڭگە سوماسىندا بيۋدجەتتىك نەسيە باعىتتالىپ، 140 مامان تۇرعىن ۇيمەن قامتىلدى» ، - دەدى ج. ولجاتاي.
بريفينگتە ءمالىم بولعانداي، 2016-جىلى «ديپلوممەن اۋىلعا» جوباسى نەگىزىندە 699 مامانعا 103,8 ميلليون تەڭگە كوتەرمە جاردەماقى مەن 954,5 ميلليون تەڭگە بيۋدجەتتىك كرەديت ءبولۋ جوسپارلانۋدا. ناتيجەسىندە 300 مامان باسپانالى بولادى دەپ كۇتىلۋدە، دەپ حابارلايدى و ق و اكىمىنىڭ باسپا ءسوز قىزمەتىنەن.
