تۇركىستاننىڭ وڭىرلىك تابيعي پاركىندەگى بۇقار بۇعىلارىنىڭ سانى 146 باسقا جەتتى
ايتا كەتەيىك، 2000 - جىلى «سىرداريا- تۇركىستان» مەملەكەتتىك وڭىرلىك تابيعي پاركىنىڭ تۇركىستان فيليالىندا سىرداريا وزەنىنىڭ بويىنداعى توعاي ورمانىنان 2 گەكتار جەر ۋچاسكەسىنە قورشاۋ ورناتىلىپ، بۇقار بۇعىلارىنىڭ تۇقىمباعى ۇيىمداستىرىلعان بولاتىن. سول كەزدە تۇركىستان قالاسىنىڭ 1500 جىلدىق مەرەيتويىنا كەلگەن مەملەكەت باسشىسى وسى ءوڭىردىڭ توعاي، ورمانىن مەكەندەگەن جانۋارلاردى كوبەيتىپ، كەلەشەك ۇرپاققا ساقتاپ قالۋ ماقساتىندا 8 باس بۇقار بۇعىسىن سىيعا تارتقان ەدى. وسىلايشا، جەرسىندىرىلگەن بۇعىلاردىڭ سانى 17 جىلدا 138 باسقا ارتىپ، 146-عا جەتتى. وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسى ماماندارىنىڭ حابارلاۋىنشا، جانۋارلاردىڭ جىلدىق ءوسىمى 6-8 باس ارالىعىندا بولسا، سوڭعى ءۇش جىلدا انالىق بۇعىلار جىلىنا 11-16 باس ارالىعىندا تولدەگەن.
ايتا وتەيىك، بۇقار بۇعىلارىنىڭ ءومىر ءسۇرۋ ۇزاقتىعى 15-20 جىل. جانۋار ءتۇرى قازىرگى تاڭدا قازاقستاننىڭ جانە حالىقارالىق تابيعاتتى قورعاۋ وداعىنىڭ قىزىل كىتاپتارىنا ەنىپ، قورعاۋعا الىنعان. ونىڭ بيولوگيالىق ەرەكشەلىكتەرى - انالىقتارىندا ءمۇيىز بولمايدى. اتالىقتارىندا بەس بۇتاقتى ءمۇيىز بولادى. ءمۇيىزى جىلما جىل ءتۇسىپ، اۋىسىپ وتىرادى. مامىر- ماۋسىم ايلارىندا تولدەيدى.
اۆتور: اينۇر اقبايەۆا
