قاڭتار وقيعاسى كەزىندە ەلىمىزدە 1466 عيماراتقا شابۋىل جاسالدى
بۇل تۋرالى ءماجىلىستىڭ جالپى وتىرىسىندا ق ر ىشكى ىستەر ءمينيسترى مارات احمەتجانوۆ ايتتى، دەپ حابارلايدى قازاقپارات ءتىلشىسى.
«پوليتسيا كۇشتەرى قارۋلى توپتاردىڭ شابۋىلىنا ۇشىراپ، ينفراقۇرىلىمعا زاقىم كەلتىرگەندىكتەن، بۇكىل الماتى بويىنشا قىلمىسكەرلەر جاپپاي ويران مەن توناۋعا كىرىستى. مەملەكەتتىك ورگانداردىڭ، قارجى ۇيىمدارىنىڭ عيماراتتارى، بانك تەرمينالدارى مەن اقشا ايىرباستاۋ ورىندارى تونالدى. توناۋ تەك الماتىدا عانا بولعان جوق. جالپى ەل بويىنشا 1466 عيماراتقا شابۋىل جاسالدى. ونىڭ ىشىندە 1395 - بيزنەس نىسانى، 71 مەملەكەتتىك مەكەمە (44 ءى ءى ب). 1700 ازامات زارداپ شەكتى. بيزنەس سۋبەكتىلەرىنە كەلتىرىلگەن زالال 100 ميلليارد تەڭگەنى قۇرادى»، - دەدى مينيستر.
مارات احمەتجانوۆتىڭ اتاپ وتۋىنشە، الماتى قالاسىندا 3 پوليتسيا باسقارماسىنا جاسالعان شابۋىلداردان باسقا، قىلمىسكەرلەر قارۋ-جاراق دۇكەندەرىن توناپ، 1440 بىرلىك قارۋ ۇرلاندى.
«ونىڭ ىشىندە 539 بىرلىك - مىلتىق، 813 بىرلىك - تەگىس ۇڭعىلى، 88 بىرلىك - جاراقاتتاۋشى قارۋ بار. بۇل قارۋ بىردەن اۋداندىق پوليتسيا باسقارمالارىنا جانە پوليتسيا دەپارتامەنتىنە جاسالعان جاڭا شابۋىلدار بارىسىندا قولدانىلدى»، - دەدى ول.
