اۋىل - ەل بەسىگى جوباسىنا بيىل 143 ميلليارد تەڭگە ءبولىندى

استانا. قازاقپارات - 2023 -جىلى مەمەلەكەت مەنشىگىنە 5 ميلليون گەكتار جەر قايتارىلماق. بۇل تۋرالى پرەمەر- ءمينيستردىڭ ءبىرىنشى ورىنباسارى رومان سكليار ءمالىم ەتتى، دەپ حابارلايدى قازاقپارات ءتىلشىسى.

«اۋىلدى دامىتۋدىڭ الداعى 5 جىلعا ارنالعان تۇجىرىمداماسى ازىرلەندى. سونداي- اق اۋىل شارۋاشىلىعىن دامىتۋ باعىتىندا دا كەشەندى جۇمىستار جۇرگىزىلىپ جاتىر. 2022 -جىلى اۋىل شارۋاشىلىعى سالاسى جوعارى ءوسۋ قارقىنىن كورسەتتى، جالپى ءونىم كولەمى 9 پروتسەنتكە ءوستى. كەيىنگى 10 جىلدا ءبىز استىق داقىلىنان ەڭ جوعارى ءونىم الدىق»، - دەدى ر. سكليار سەناتتاعى «ءتيىمدى وڭىرلىك ساياسات - ەلىمىزدىڭ ورنىقتى الەۋمەتتىك- ەكونوميكالىق دامۋىنىڭ نەگىزى» تاقىرىبىنداعى پارلامەنتتىك تىڭداۋدا.

ونىڭ ايتۋىنشا، 5,2 ميلليون گەكتار اۋىل شارۋاشىلىعى جەرى مەملەكەت مەنشىگىنە ءوتتى. 2023 -جىلى تاعى 5 ميلليون گەكتار جەر قايتارىلماق.

«بۇدان بولەك، جالپى سىيىمدىلىعى 201 مىڭ توننا كوكونىس ساقتاۋ قويماسى ىسكە قوسىلدى. ازىق- تۇلىك قاۋىپسىزدىگى جوسپارى مەن قانت ونەركاسىبىن دامىتۋدىڭ كەشەندى جوسپارى قابىلداندى. ناتيجەسىندە ازىق- تۇلىك ءوندىرىسى 4 پروتسەنتكە ءوستى»، - دەدى ۇكىمەت باسشىسىنىڭ ءبىرىنشى ورىنباسارى.

سونىمەن قاتار ول «اۋىل - ەل بەسىگى» جوباسىن جۇزەگە اسىرۋ ناتيجەسىنە توقتالدى.

«وتكەن كەزەڭدە (2019-2022) 326 ميلليارد تەڭگە ءبولىنىپ، 4 مىڭعا جۋىق جوبا جۇزەگە اسىرىلدى. بۇل ءوز كەزەگىندە 334 تۇرعىن ءۇي- كوممۋنالدىق، 1,2 مىڭ الەۋمەتتىك ينفراقۇرىلىم نىسانىن جانە 2 مىڭ كولىك ينفراقۇرىلىمى جوباسىن جاڭعىرتۋعا مۇمكىندىك بەردى. كەيىنگى جىلدارى بارلىعى 1031 اۋىل ارنايى جوبالارمەن قامتىلدى. «اۋىل - ەل بەسىگى» جوباسى بويىنشا بيىل 736 اۋىل ءۇشىن 1,5 مىڭنان استام جوباعا 143 ميلليارد تەڭگە ءبولىندى. 119 تۇرعىن ءۇي- كوممۋنالدىق نىسانى، 275 الەۋمەتتىك ينفراقۇرىلىم نىسانى جانە 1 مىڭ كولىك ينفراقۇرىلىمى جوباسى جاڭعىرتىلادى»، - دەدى ر. سكليار.

اۆتور

ينديرا ساتەنباي