تابىسىنا قاراماستان 141 ميلليارد تەڭگە جاردەماقى 458878 وتباسىعا اۋدارىلدى
بۇل تۋرالى ق ر ەڭبەك جانە حالىقتى الەۋمەتتىك قورعاۋ مينيسترلىگى الەۋمەتتىك كومەك ساياساتىن دامىتۋ دەپارتامەنتىنىڭ ديرەكتورى اسقار نيازوۆ ايتتى، دەپ حابارلايدى قازاقپارات ءتىلشىسى.
«2020 -جىلى بالا كۇتىمىنە بايلانىستى جاردەماقى جالپى سوماسى 31,7 ميلليارد تەڭگە كولەمىندە 120,9 مىڭ ادامعا تولەندى. ال 2021 -جىلعا بۇل ماقساتقا 26 ميلليارد تەڭگە قاراستىرىلىپ وتىر. ونىڭ ىشىندە ءاربىر بالالى وتباسىعا بالا تۋۋىنا بايلانىستى 6,8 ميلليارد تەڭگە جاردەماقى تولەندى. قازىرگى ۋاقىتتا ەلىمىزدە 458 مىڭنان استام كوپبالالى وتباسى بار. بۇل ساناتقا كامەلەتكە تولماعان 4 جانە ودان دا كوپ بالاسى، ونىڭ ىشىنە 23 جاسقا تولماعان، كۇندىزگى وقۋ بولىمىندە وقيتىن ستۋدەنتتەرى بار وتباسىلار قوسىلىپ وتىر»، - دەدى ول ورتالىق كوممۋنيكاتسيالار قىزمەتىندەگى بريفينگ بارىسىندا.
ونىڭ دەرەگىنشە، مۇنداي وتباسىلارعا 2021 -جىلدىڭ 1-قاڭتارىنان باستاپ تابىسىنا قاراماستان تولەنەتىن جاردەماقى ەنگىزىلگەن. تولەمدەردىڭ مولشەرى بالا سانىنا بايلانىستى سارالانعان تۇردە تولەنەدى. 4 بالاعا 46760 تەڭگە، 5 بالاعا 58457 تەڭگە، 6 بالاعا 70154 تەڭگە، ال ودان كەيىنگى بالالاردىڭ ءارقايسىسىنا 11668 تەڭگەدەن بەرىلەدى. بۇل تولەم اي سايىن وتباسىنىڭ تابىسىنا قاراماستان جۇرگىزىلەدى.
«وسى جىلدىڭ 6 ايىندا اتالعان جاردەماقى 458878 وتباسىعا جالپى سوماسى 141 ميلليارد تەڭگە كولەمىندە اۋدارىلدى. مۇنان باسقا ەلىمىزدە كوپبالالى ارداقتى انالارىمىز بار. ارداقتى انالارىمىزدى دا الەۋمەتتىك قولداۋ شارالارى قاراستىرىلعان. انالاردىڭ ابىرويى مەن بەدەلىن ارتتىرۋ ءۇشىن تابىسىنا قاراماستان التىن القا، كۇمىس القا يەگەرلەرىنە مەملەكەتتىك جاردەماقى تاعايىندالادى. قازىرگى ۋاقىتتا جاردەماق مولشەرى 18669 تەڭگەنى قۇراپ وتىر. اتالعان جاردەماقى 231,3 مىڭ باتىر انالارىمىز الادى. جىل باسىنان ولارعا 25,8 ميلليارد تەڭگە كولەمىندە قاراجات تولەندى»، - دەدى اسقار نيازوۆ.
