جانارمايدى قازاقستاننان كورشى ەلدەرگە شىعاراتىندار جىلىنا 140 ميلليون دوللار پايدا تاۋىپ وتىر - بولات اقشولاقوۆ

استانا. قازاقپارات – ق ر ەنەرگەتيكا ءمينيسترىنىڭ مىندەتىن اتقارۋشى بولات اقشولاقوۆ قازاقستاننان ديزەل وتىنىن كورشى ەلدەرگە شىعاراتىندار قانشا پايدا تاۋىپ جاتقانىن ايتتى، دەپ حابارلايدى قازاقپارات ءتىلشىسى.

«قازاقستاننان ديزەل وتىنىن ءتۇرلى جولداردى پايدالانىپ، شەتەلگە ساتۋدان تۇسەتىن («كولەڭكەلى» ەكسپورتتان) پايدا 50 پايىزدان 120 پايىزعا دەيىن جەتەدى. جالپى پايدا جىلىنا شامامەن 140 ميلليون ا ق ش دوللارىنا دەيىن جەتەدى»، - دەدى ب. اقشولاقوۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

ەنەرگەتيكا مينيسترلىگىنىڭ مالىمەتىنشە، جۇك كولىكتەرى قوسىمشا تسيستەرنالارمەن جابدىقتالعان كوپتەگەن فاكتىلەر بار. وسىلايشا، ءبىر جۇك كولىگى بىردەن ءبىر توننادان ءتورت تونناعا دەيىن جانارماي قۇيا الادى. ەگەر مۇنداي جۇك كولىگى قازاقستاندا جانارماي قۇيىپ، وزبەكستانعا وتىندى وتكىزۋگە بارسا، 1 توننادان 700 دوللار پايدا تابۋعا بولادى. سونىمەن قاتار قىرعىزستانعا بارسا، 250 دوللار تابىس الادى.

بۇدان بۇرىن حابارلانعانداي، قازاقستاندا بەنزين مەن ديزەل وتىنىنىڭ باعاسى وسەدى.

ق ر ەنەرگەتيكا ءمينيسترىنىڭ مىندەتىن اتقارۋشى بولات اقشولاقوۆ ەلىمىزدە جانارماي باعاسىنىڭ وسۋىنە قانداي سەبەپتەر اسەر ەتىپ وتىرعانىن ايتتى.