كرەديتتىك تۇرعىن ءۇيدىڭ شارشى مەترى 140 مىڭ تەڭگە بولادى

اي سايىن «تۇرعىن ءۇي قۇرىلىس جيناق بانكى» سالىمشىلارى ەكى بولمەلى پاتەر ءۇشىن شامامەن 50-70 مىڭ تەڭگە تولەيدى.
بۇل تۋرالى بۇگىن مەملەكەتتىك بيۋدجەتتەن جانە ۇلتتىق قوردان بولىنەتىن قاراجاتتىڭ ماقساتتى جۇمسالۋىنا باقىلاۋ جۇرگىزۋ بويىنشا ماجىلىستەگى «نۇر وتان» پارتياسىنىڭ فراكسياسى جانىنداعى تۇرعىن ءۇي كوممۋنالدىق شارۋاشىلىق ينفراقۇرىلىمىن جاڭعىرتۋ باعىتى بويىنشا كوميسسيا وتىرىسىندا ق ر ۇ ە م قۇرىلىس ىستەرى جانە تۇرعىن ءۇي- كوممۋنالدىق شارۋاشىلىق كوميتەتىنىڭ ءتوراعاسى مارحابات جايىمبەتوۆ ايتتى، دەپ حابارلايدى Baq.kz ءتىلشىسى.
«تۇرعىن ءۇي قۇرىلىسىنا بايلانىستى «نۇرلى جول» باعدارلاماسىندا بولعان دۇنيەنىڭ ءبارى «نۇرلى جەر» باعدارلاماسىنا كوشىپ وتىر. باعدارلامانىڭ بىرىنشى باعىتى بويىنشا يپوتەكاعا سۇرانىستى ىنتالاندىرۋ ءۇشىن ازاماتتارعا سۋبسيديا بولىنەدى. مىسالى، ەكىنشى دەڭگەيدەگى بانكتەر 17 پايىزبەن بورىش بەرسە، سونىڭ 7 پايىزىن مەملەكەت سۋبسيديالايدى. وسىلايشا، ازاماتتار 10 پايىزبەن يپوتەكا الاتىن بولادى. ەكىنشى باعىت بويىنشا قۇرىلىس كومپانيالارىنا دا وسىنداي قولداۋ كورسەتىلەدى»، - دەدى م. جايىمبەتوۆ.
باعدارلامانىڭ ءۇشىنشى باعىتى - كرەديتتىك تۇرعىن ءۇي. بۇل باعىت بويىنشا 250 مىڭ پاتەر سالىنادى.
«بىلتىر ەلباسىنىڭ تاپسىرماسى بويىنشا قۇرىلىس سالاسىنا 400 ميلليارد تەڭگە قاراجات ءبولىندى. سونىڭ ىشىندە «بايتەرەك» ا ق- عا 180 ميلليارد تەڭگە، «سامۇرىق- قازىنا» جىلجىمايتىن مۇلىك قورىنا 97 ميلليارد تەڭگە بەرىلدى. بۇل 277 ميلليارد تەڭگە، وسى قاراجاتقا 2016-2017 -جىلدارى بارلىق وڭىرلەردە قۇرىلىس سالىنادى. سوسىن 2018 -جىلدان باستاپ ۇيلەر اكىمدىكتەرگە بەرىلەتىن بولادى. ءبىزدىڭ جوسپار بويىنشا 15 ميلليارد تەڭگەدەن ءار ءوڭىر، شىمكەنت، اقتوبە 20 ميلليارد، استانا مەن الماتى قالالارى 30 ميلليارد تەڭگە شاماسىندا قۇرىلىس سالادى. ءۇيدىڭ باعاسى بارلىق وڭىرلەردە شارشى مەترى 140 مىڭ تەڭگەدەن بولادى. الماتى، استانا، اقتاۋ، اتىراۋ قالالارىندا - 180 مىڭ تەڭگە.
وزدەرىڭىز بىلەسىزدەر، نارىقتا 260-280 مىڭ تەڭگەدەن جوعارى. ءبىزدىڭ قازىرگى ەسەبىمىز بويىنشا، «تۇرعىن ءۇي قۇرىلىس جيناق بانكى» سالىمشىلارى اۋماعى 50-60 شارشى مەتر بولاتىن ەكى بولمەلى ۇيگە شامامەن اي سايىن 50-70 مىڭ تەڭگە تولەيدى. بۇلار مەملەكەتتىك قىزمەتشىلەر، مۇعالىمدەر، دارىگەرلەر، ولارعا قالتاسى كوتەرەتىندەي مۇمكىندىك بەرىلىپ وتىر. سوسىن الەۋمەتتىك جاعىنان ءالجۋاز توپتارعا دا مۇمكىنشىلىك بار»، - دەدى كوميتەت ءتوراعاسى.
باعدارلامانىڭ ءتورتىنشى باعىتى - ساتىپ الىنبايتىن جالدامالى ۇيلەر. بۇل باسپانا ءبىرىنشى توپتاعى مۇگەدەكتەر مەن جەتىم بالالارعا بەرىلەدى.
بۇدان بولەك، «نۇرلى جەر» باعدارلاماسى بويىنشا جەكە تۇرعىن ءۇي قۇرىلىسىنا ۇلكەن كوڭىل بولىنەدى.
«نۇرلى جەر» باعدارلاماسى بويىنشا 15 جىلدا 1,5 ميلليون پاتەر تاپسىرىلادى. ونىڭ 45 پايىزى جەكە تۇرعىن ۇيلەرگە بەرىلەتىن قارجى. مەملەكەت جىل سايىن ينفراقۇرىلىمدى سالۋعا 80 ميلليارد تەڭگە قارجى بولەدى. ءبىزدىڭ جوسپار بويىنشا جىل سايىن 42 مىڭ جەكە تۇرعىن ءۇي سالىناتىن بولادى»، - دەپ اتاپ ءوتتى م. جايىمبەتوۆ.
ايىمگۇل ابىلەۆا
https://baq.kz/kk