ەلباسىنىڭ تاپسىرماسىمەن ەلوردالىق وقۋشىلار سارايىندا اۋماعى 1400 شارشى مەتىردى قۇرايتىن «ينتەراكتيۆتى ساياباق» قۇرىلادى - فوتو

استانا. قازاقپارات - قازاقستان تۇڭعىش پرەزيدەنتى كۇنىندە «قازاقپارات» ءتىلشىسى وقۋشىلار سارايى ديرەكتورىنىڭ ۋاقىتشا مىندەتىن اتقارۋشى قىمبات ەرگەبايەۆانى اڭگىمەگە تارتىپ، مەكەمەنىڭ جۇمىسىمەن جانە الداعى جوسپارلارىمەن تانىستى.

- قىمبات مۇقان قىزى، وقۋشىلار سارايى جايلى، وندا قازىر قانداي ۇيىرمەلەر جۇمىس ىستەيتىنى تۋرالى ايتىڭىزشى؟

- بۇل ساراي 2011 - جىلى مەملەكەت باسشىسىنىڭ تاپسىرماسىمەن سالىنعان. ءبىزدىڭ ەلباسى ناعىز ستراتەگ جانە قامقور كوشباسشى رەتىندە بولاشاقتا قازاقستاندىق ەليتانىڭ نەگىزىن قۇرايتىن جاستاردىڭ ءبىلىم الۋىنا جاقسى جاعدايلار جاساپ كەلەدى.

 قازىرگى ۋاقىتتا وقۋشىلار سارايىندا 9304 بالا ءبىلىم ءنارىنان سۋسىنداتۋدا. ولار 116 ۇيىرمە مەن سەكسياعا قاتىسادى. تالىمگەرلەردىڭ %80 ى بيۋدجەتتىك توپتاردا ءبىلىم الۋدا. وندا تۇرمىسى تومەن جانۇيالاردان شىققان، مۇگەدەك، دارىندى جانە وزگە دە بالالار بار.

 سارايدا زەرتحانالار، 3Д تەحنولوگياسىن پايدالانۋ ارقىلى پانورامالىق، سفەرالىق جانە عالامشارلىق كەسكىندەمە كورسەتۋگە مۇمكىندىك بەرەتىن پلانەتاري، وبسەرۆاتوريا، مەدياورتالىق، سپورتتىق مانەجدەر، ءجۇزۋ باسسەينى، مۇز الاڭى جانە وزگە دە نىساندار بار.

بالالار مۇندا بارلىق سالا بويىنشا ءتۇرلى زەرتتەۋ جۇمىستارىنا قاتىسا الادى.

 ءبىز ءاردايىم شەتەلدىك دەلەگاتسياعا ساياحات ۇيىمداستىرامىز. شەتەلدىك قوناقتاردىڭ كوبى ءبىزدىڭ سارايىمىزدىڭ ماتەريالدىق- تەحنيكالىق بازاسىنا تاڭدانادى. ولاردىڭ كەيبىرەۋلەرى الەمدىك ەكونوميكاداعى داعدارىس جاعدايىنا قاراماستان، وسىنداي بالاباقشالار، مەكتەپتەر مەن وزگە نىسانداردى سالۋعا قاۋقارلى مەملەكەتتىڭ بولاشاعى جارقىن دەپ ايتادى.

- احمەت بايتۇرسىنوۆ «مەكتەپتىڭ جانى - مۇعالىم. مۇعالىم قانداي بولسا، مەكتەپ تە سونداي بولماقشى» دەگەن. وقۋشىلار سارايىندا بالالارعا تاربيە بەرەتىن پەداگوگتار مەن جاتتىقتىرۋشىلارعا توقتالا كەتسەڭىز.. .

 - بىزدە بارلىعى 169 پەداگوگ جۇمىس ىستەيدى. ولاردىڭ جارتىسىنان استامىنىڭ بىلىكتىلىگى ءبىرىنشى نەمەسە جوعارى دەڭگەيدە. شامامەن % 20 ى - ەكىنشى كاتەگورياداعى مۇعالىمدەر. ءبىزدىڭ قىزمەتكەرلەرىمىزدىڭ اراسىندا عالىمدار، بەلگىلى ماماندار، مۋزىكانتتار، عىلىم، مادەنيەت جانە سپورت قايراتكەرلەرى، سولاردىڭ ىشىندە 5 عىلىم دوكتورى، 5 عىلىم كانديداتى، رەسەي سۋرەتشىلەر شىعارماشىلىعى ورتالىعى مەن حالىقارالىق سۋرەتشىلەر قاۋىمداستىعىنىڭ 2 مۇشەسى، ق ر سۋرەتشىلەر وداعىنىڭ 5 مۇشەسى، 4 قازاقستان مادەنيەتىنىڭ قايراتكەرى، ءتۇرلى سپورت بويىنشا ازيانىڭ جانە الەمنىڭ 9 چەمپيونى، 13 ق ر سپورت شەبەرى جانە سپورت شەبەرىنە ۇمىتكەر بار.

- سىزدەردىڭ سارايىڭىزدا بالالار قانداي ۇيىرمە نەمەسە سەكسياعا قىزىعۋشىلىق تانىتادى؟

 - سپورتتىق سەكتسيالارعا، سونىمەن قاتار حورەوگرافيا، ۆوكال جانە وزگە دە ۇيىرمەلەرگە باسىمدىق بەرەدى. سوڭعى كەزدەرى بالالاردىڭ عارىشتىق مودەلدەۋ مەن روبوتوتەحنيكاعا دەگەن قىزىعۋشىلىعى ارتىپ كەلە جاتقانىن بايقايمىز. ماسەلەن، ءبىزدىڭ بالالار حيميا ۇيىرمەسىنىڭ جەتەكشىسى عىلىم دوكتورى، پروفەسسور ەرلان سۇلەيمەنمەن بىرلەسىپ، ءيىسسۋ جاساعان. ونىڭ قۇرامىندا قازاقستان اۋماعىندا وسەتىن وسىمدىكتەر بار. سونداي- اق ءبىزدىڭ وقۋشىلار قاعاز جانە جاساندى بال ءوندىرۋدىڭ ەكولوگيالىق تازا تەحنولوگياسىن ۇسىندى.

 ءبىزدىڭ قۇراستىرۋ جانە روبوتوتەحنيكا سەكتسيامىز بۇل سالاداعى شەتەلدىك ۇيىمدارمەن ارىپتەستىك اياسىن كەڭەيتۋدە. بەلورۋسسيالىق جانە وڭتۇستىككورەيلىك روبوت قۇراستىرۋشىلارمەن ىنتىماقتاستىق ورناتتىق. عىلىمي- ادىستەمەلىك ورتالىق قۇرۋ جوسپاردا بار.

 1,5 -جىل قاتارىنان تالىمگەرلەر  بالالار جورنالىن شىعارۋعا قىزىعۋشىلىق تانىتۋدا. ول مەدياورتالىقتا بەتتەلەدى. وندا جۋرناليستيكا ۇيىرمەسى، فوتو جانە ۆيدەوستۋديا جۇمىس جاسايدى.

كونكيمەن جۇگىرۋ سەكتسياسىن اشۋدامىز. بولاشاقتا تالىمگەرلەرىمىز الەمدىك سىنداردا قازاقستان قورجىنىن القالارمەن تولىقتىرادى دەگەن ۇمىتتەمىز.

- وقۋشىلار سارايىنىڭ بولاشاقتاعى جوسپارى جايلى، كەلەسى جىلى بالالاردى قانداي جاڭالىق كۇتىپ تۇرعانىن ايتساڭىز

 - كەلەسى جىلدىڭ باسىندا «عىلىمنىڭ ۆيرتۋالدى مۇراجايى» اتتى جاڭا جوبانى ىسكە قوسامىز. ۆيرتۋالدى تەحنولوگيالار ارقىلى بىزگە كەلۋشىلەر الەمنىڭ كەز- كەلگەن جەرىندەگى اسەم ورىنداردى، ءتۇسى، كولەمى جانە پىشىنىنە قاراماستان وندىرىستىك ينفراقۇرىلىمنىڭ نىساندارى مەن عيماراتتارىن تاماشالاي الادى. ەندى بالالارىمىزدىڭ مارستا نەمەسە امازونكا ورماندارىندا بولۋ ارمانى ورىندالادى.

 تاعى ءبىر جاڭالىق ەلباسىنىڭ تاپسىرۋىمەن جۇزەگە اساتىن «ينتەراكتيۆتى ساياباق» جوباسى. ونىڭ ماقساتى جاستاردىڭ شىعارماشىلىق جانە عىلىمي مۇمكىندىگىن ارتتىرۋ. وندا عىلىم، تەحنيكا، سپورت جانە ونەردىڭ بارلىق سالالارى بويىنشا ەكسپوناتتار مەن ينتەراكتيۆتى ستەندتەر كەشەنى كورسەتىلەدى. باستاپقى كەزدە ساياباق الاڭى 1400 شارشى مەتردى قۇرايدى.

 ءبىزدىڭ پىكىرىمىزشە، بۇل جوبالار جاستاردىڭ شىعارماشىلىق مۇمكىندىگىن دامىتادى. ۆيرتۋالدى مۇراجاي مەن ينتەراكتيۆتى ساياباق وقۋشىلاردىڭ، ستۋدەنتتەردىڭ، بالالارى بار وتباسىلاردىڭ قىزىعۋشىلىعىن ارتتىرىپ، ولاردىڭ بىزگە كەلۋىنە تۇرتكى بولادى.

- اڭگىمەڭىزگە راحمەت! يگى جۇمىسىڭىزعا تابىس تىلەيمىز!