بيىل شەكارا ماڭىنداعى 140 اۋىلدا 290 جوبانى ىسكە اسىرۋ جوسپارلانىپ وتىر
«ەلىمىزدە 65 اۋداندا 1,7 ميلليون ادام تۇراتىن بارلىعى 1283 شەكارا ماڭىنداعى اۋىل بار.
«اۋىل - ەل بەسىگى» جوباسىن ىسكە اسىرۋ اياسىندا 2023-جىلعا 140 شەكارا ماڭىنداعى اۋىلدا 290 جوبانى ىسكە اسىرۋ جوسپارلانىپ وتىر»، - دەدى ءا. قۋانتىروۆ ۇكىمەت وتىرىسىندا پرەزيدەنتتىڭ ق ر پارلامەنتى سەسسياسىنىڭ اشىلۋىندا بەرگەن تاپسىرمالارىن ىسكە اسىرۋ بارىسىن تالقىلاۋ كەزىندە.
ونىڭ ايتۋىنشا، اۋىلدىق اۋماقتاردى دامىتۋدىڭ 2023-2027 -جىلدارعا ارنالعان جاڭا تۇجىرىمداماسىندا شەكارا ماڭىنداعى اۋماقتاردى دامىتۋعا ايرىقشا كوڭىل ءبولىندى. ماسەلەن، تۇجىرىمداما اياسىندا الەۋمەتتىك ءارى ينجەنەرلىك ينفراقۇرىلىمدى سالۋ جانە جوندەۋ، وتاندىق تەلەارنالاردىڭ تسيفرلىق ەفيرلىك تەلە جانە راديو حابار تاراتۋىن قامتاماسىز ەتۋ، ەڭبەك تاپشىلىعى بار شەكارا ماڭى اۋىلدىق وكرۋگتەرىندەگى تۇرعىنداردىڭ جالاقىسىنا ۇستەمەاقى قوسۋ جانە ولارعا باسقا دا جەڭىلدىكتەر بەرۋ مۇمكىندىگى كوزدەلگەن. بۇدان باسقا، وتكىزۋ پۋنكتتەرىنىڭ ينفراقۇرىلىمىن دامىتۋ كوزدەلگەن.
«شەكارا ماڭىنداعى وڭىرلەردى قوسا العاندا، بۇكىل اۋىل حالقىنىڭ تابىسىن ارتتىرۋعا باعىتتالعان قۇرالداردىڭ ءبىرى «اۋىل اماناتى» جوباسىن ىسكە اسىرۋ بولادى. ول ءۇشىن ءاربىر اۋىلدىق وكرۋگتىڭ باعىتىن ايقىنداي وتىرىپ، سكرينينگ جۇرگىزۋ، سونداي- اق، جەكە قوسالقى شارۋاشىلىقتارعا ميكروكرەديت بەرۋ، سەرۆيستىك- وتكىزۋ كووپەراتيۆتەرىن قالىپتاستىرۋ، تەحنيكامەن جانە جابدىقپەن ليزينگ ارقىلى قامتاماسىز ەتۋ شارالارى ىسكە اسىرىلاتىن بولادى»، - دەدى ءمينيستردىڭ مىندەتىن اتقارۋشى.
ايتا كەتەيىك، مەملەكەت باسشىسى جان- جاقتى جاڭعىرتۋ بويىنشا ناقتى مىندەتتەردى قويعان بولاتىن. سونىڭ ىشىندە الەۋمەتتىك- ەكونوميكالىق دامۋعا تىڭ سەرپىن بەرۋ قاجەت ەكەنىن اتاپ ءوتتى. ۇلتتىق ەكونوميكا مينيسترلىگىنىڭ مالىمەتىنشە، پرەزيدەنتتىڭ تاپسىرمالارىن ىسكە اسىرۋ ماقساتىندا 8 باعىت بويىنشا 32 شارادان تۇراتىن ءىس- شارالار جوسپارى پرەزيدەنت اكىمشىلىگىندە كەلىسۋدەن ءوتىپ جاتىر.
اۆتور
رۋسلان عابباسوۆ
